Iazko inaugurazioko argazkia. Biharkoa antzerakoa izango da, baina batzuk ez dute errepikatuko, eta berriak sartuko dira
Sua piztuko dute bihar arratsaldean Hondarribiko Arrantzale Auzoan. Portuan piztuko dute sua baina herri osoan nabarituko dute berotasuna. Aro berriko herri olinpiaden laugarren ekitaldia abiatuko da bihar, eta apirilaren 29ra arte ez dituzte sugarrak amatatuko. Hiru hilabetez kalea hartuko dute gazte kuadrillek, eta abisua eman dute: neguari aurre egiteko prest daude.
Sei jardunaldik osatzen dute IV. Herri Olinpiadetako egutegia. Sei jardunaldi hiru hilean, bina otsailean, martxoan eta apirilean. Aurten beranduago iritsi dira neguko olinpiadak —III.ak azaroa bukaeratik maiatzera egin zituzten—. Baina iritsi dira, Hori da kontua.
Aurreko ekitaldia bukatu zenean kuadrillek bilera egin zuten balorazioa egiteko, eta eztabaida abiatu zuten. Iazko garaile izan zen Hoz Ez Pattuk taldeko Mitxel Arzakek azaldu duenez, antolatzeko moduan, ardurak partekatzeko orduan aldaketak izango dira. “Aurten inprobisazioari leku gehiago utziko diogu, lanak beste modu batera banatuko ditugu”, iragarri du.
Inprobisazioak ez du antolakuntza gutxiago esan nahi, eta biharko ekitaldiari adi egoteko iradoki du Arzakek, “sorpresak egongo direlako”. Taldeen aurkezpena izango dela, argazki ofizialak egin behar direla, eta logoaren lehia izango dela, hori badakite gazteek. Baina gertatuko diren gauza batzuek ezustean hartuko dituzte gazteak, eta antolatzaileek hori bilatuko dute olinpiaden ekitaldi berriarekin, jardunaldi bakoitzarekin harridura sortzea, emozionatzea.
Ondo pasatzea helburu
Taldeen argazki ofizialak egiteaz gain eta herria hankaz gora jartzeaz gain, olinpiadetako lehen proba puntuagarria egingo dute bihar, logo proba. Aurtengo olinpiadetako ikurra da aukeratu behar dutena, eta izen handiko herritarrez osaturiko epaimahai baten esku geratuko da erabakia. Epaileen eta, oro har, edozertan esku bat botatzen dutenen laguntza asko estimatzen dutela adierazi du Arzakek: “Festa handia izango da, baina saiatuko gara dena arin joan dadin, epaimahaiak egiten duen esfortzua kontuan eduki behar dugu”.
Hok ez pattuk taldeak irabazi ditu egin diren bi logo probak. Irudikoa duela bi urtekoa da
Azken bi urteetan Hok Ez Pattuk-en logoa izan da jokoen ikurra —lehen ekitaldian ez zen proba hori egin—. Aurten berriro irabazten saiatuko dira, baina estrategia berezi samarra hautatu dutela jakinarazi du Arzakek: “Bazkarian egingo dugu zer edo zer. Probaren aurretik kuadrillaren bazkaria egingo dugu eta hor marraztuko dugu logoa”.
Asko dira bihar bazkaltzeko geratuko diren taldeak. Logoa bukatu, banderak prestatu, arropak estreinatu… Lan handia egin behar dute bihar olinpiadetako parte hartzaileek eta lauak eta erdietan Arrantzale Auzoan egon behar dute, argazkietarako prest. Ashkorax taldeak ere bazkaria du bihar. Garai bateko olinpiadetan ere parte hartu zuten. Aurreko urteetan izan dira beterano batzuk, baina Ashkorax dira iraun duten bakarrak. Izaskun Amunarrizen arabera, ondo pasatzen duten bitartean jarraituko dute olinpiadetan parte hartzen: “Oso ondo pasatzen dudalako parte hartzen dut, plan alternatibo bat delako eta, bide batez, kirol pixka bat egiten dugulako. Giroa ezin hobea da”.
Zaila da esaten zein proba izango diren ikusgarrienak, edo zeinetan izango den girorik onena. Baina badira klasiko batzuk, parodia kasu, barrutik eta kanpotik modu berezian bizitzen direnak: “Niri gehien kostatzen zaidana —onartu du Amunarrizek—, parodia prestatzea da, baina baita gehien gustatzen zaidana ere, barre asko egiten ditugu (bideoan, duela bi urte Ashkoraxek parodia irabazi zuenekoa). Menditik barrena egiten diren probak ere oso ondo daude”.
Lagunak egiteko aukera
Laugarrenez egingo dituzte aurten aro berriko herri olinpiadak. 2014an berreskuratu zituztenean garai batekoak izan zituzten buruan —1987tik 1995era egin zituzten—, eta haiek antolatzen aritu zirenekin elkartu ziren gazteak. Izan ere, antzerako helburuak zituzten: neguan itzalita egoten den herria piztu, gazte kuadrillak harremanetan jarri, eta gazteek beraiek izatea egin nahi dutena erabaki eta burutzen dutenak.
Arzaken ustez, helburuetako batzuk lortu dituzte: “Hondarribian gazte lokal asko daude, eta gazteak ez dira kalean ikusten. Olinpiadekin hori lortu da, gazteak kalera ateratzea, kuadrilla batzuk besteekin aritzea, lagun berri asko egitea”. Elkarrekin gauza handiak egiteko gaitasuna erakutsi dutela erantsi du.
Amunarrizek garai zaharreko eta berriko olinpiadak ezagutu ditu. Biak ezagutu eta bietan parte hartu. Orain zailagoa dela onartu du, baina merezi duela zalantzarik ez du: “Ni beste belaunaldi batekoa naiz eta jende asko ezagutu dut olinpiadekin, gazte asko. Gure taldearentzat, gainera, aitzakia ederra dira olinpiadak elkarrekin egoteko, haurrak ditugunez, geroz eta gutxiago elkartzeko aukera dugulako”.
Aurreko ekitaldian baino talde gutxiago izango dira aurten, batzuek utzi dutelako eta beste batzuk elkartu direlako. Baina berriak ere badira: Tente Ta Potente eta Anonimus. Ikusteko dago zeintzuk diren, estreinakoz probetan nola moldatzen diren, eta sailkapenean non bukatzen duten. Baina gauza bat argi dago, ahaztuko ez duten esperientzia bat biziko dute, eta dozenaka lagun berri egingo. Hori da IV. Herri Olinpiadez aurrera daitekeen gauza bakarra. Gainontzeko guztia, ezustekoa izan dadila.
Azken berriak
Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.
Hasi saioa HITZAkide gisa
Saioa hasten baduzu, HITZAkide izatearen abantailak baliatu ahal izango dituzu.
HITZAkide naiz, baina oraindik ez dut kontua sortu SORTU KONTUA
Zure kontua ongi sortu da.
Hemendik aurrera, zure helbide elektronikoarekin eta pasahitzarekin konektatu ahal zara, HITZAkide izatearen abantaila guztiak baliatzeko.
Ezagutu HITZAkide izatearen abantailak eta aukeratu HITZAkide izateko gustuko modalitatea
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
Ezagutu HITZAkide izatearen abantailak eta aukeratu HITZAkide izateko gustuko modalitatea.
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.