Olinpiadetako webgune berezia, HITZAn

'bidasoa.hitza.eus/olinpiadak' webgunean argazkiak, bideoak, kronika serioak eta sailkapena azalduko dira, baita biharko taldeen argazki ofizialak ere.

Asier Perez-Karkamo

Hondarribia

2017/02/02

Olinpiadak gertutik jarraituko ditu Hitzak

Sei jardunaldi, bina otsailean, martxoan eta apirilean. Sei dira garai berriko Hondarribiko IV. Herri Olinpiaden egutegia osatuko duten jardunaldiak. Sei egun, beste horrenbeste proba. Eta horien guztien jarraipen berezia egingo du Oarso Bidasoko Hitzak. Bihartik aurrera, Hondarribiko Hitzak olinpiadetan gertatzen den guztiaz informatuko du, horretarako propio sortu duen webgunearen bitartez —dagoeneko bisita daiteke bidasoa.hitza.eus/olinpiadak helbidean—. Gainera, webgunera igoko dituen eduki guztiak (testuak, argazki galeriak, bideoak…), sare sozialen bidez zabalduko dira: Twitter (@hondarribihitza) nahiz Facebook bitartez (@HitzaHondarribia). Twitter kontua jarraitzen dutenek eta Facebook orrialdea atsegiten dutenek, argitaratu bezain pronto izango dute olinpiadei buruzko edukien berri. Bihartik hasita egingo du bat olinpiadekin Hitzak. Hasteko, inaugurazio ekitaldian talde guztien argazki ofiziala egingo du eta gertatzen denari buruzko kronika idatziko du ondoren. Dena ongi, bihar bertan zintzilikatuko dira taldeen argazkiak olinpiadetako webgune berezian. Kronika serioak Gainera, duela bi urte harrera bikaina izan zuten kronika serioak —irribarrea eragiteko asmoz idatzitakoak— itzuliko dira. Eta berritasun bat, sailkapena ere agertuko da webgunean, lehiaketa bakoitzaren ondoren eguneratuko dena. Hondarribiko Hitzak esfortzu berezia egingo du aro modernoko IV. joko herrikoiak testuz, argazkiz eta bideoz landuz, baina propioak ez diren edukiak ere partekatzeko bidea izan nahi du. Hala, webgune olinpikoarekin kolaboratu nahi duenak, posta elektronikoaren bidez egin dezake.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.