'Jainko basatia', barreak eta kritika soziala taula gainean
Lau aktore ezagunek osatzen dute antzezle taldea: Teresa Andonegi, Andoni Agirregomezkorta, Mikel Losada eta Aitziber Garmendia.
Txalo konpainiaren eskutik, Jainko basatia komedia dramatikoa iritsiko da igandean Hondarribiko Itsas Etxea Auditoriumera. Begoña Bilbaok zuzenduriko obra da eta Teresa Andonegi, Andoni Agirregomezkorta, Mikel Losada eta Aitziber Garmendia igoko dira eszenatokira. Jatorrizko testua Yasmina Reza idazle eta antzezle frantziarrarena da eta Le dieu du carnage (Triskantzaren jainkoa) izenburuarekin estreinatu zen.
Euskarazko moldaketarako Martin Agirrek egin du itzulpena. Txalok ekoizten duen Rezaren bigarren lana da, 2006an Ramon Agirrek, Joseba Apaolazak eta Asier Hormazak taulaz taula eraman zuten Artea-ren ondoren.
Komedia dramatikoa da Jainko basatia, aitzakia batetik abiatuta —ume batek beste bat jo egiten du—, giza harremanen gaineko gogoeta egiten duena. Ez da komedia hutsal bat eta, horretakoak asko badirenez, euskarazko antzerki zaleak gustura hartuko du proposamena. Orain arteko emanaldietan publikoak ondo erantzun du, eta kritikek nota altua jarri diete eszenaratzeari eta aktore taldearen lanari.
Liskar bat abiapuntu
Seme-alaben arteko liskarrak konpontzeko elkartzen diren bi bikoteen istorioa kontatzen du obrak. Mutiko batek beste bat jo du, eta arazoa konpontzeko elkartu dira bi bikoteak, mutikoen gurasoak. Bilera edukazio handiz hasiko da, baina hasi eta gutxira beste bide bat hartuko du, mutikoen gurasoen frustrazio eta miseriak azalaraziz.
Aitziber Garmendia Ane da, banketxe bateko langilea, emakume lasaia eta baketsua, alkoholaren aparretan murgiltzen den arte. Mikel Losada Alex da, Aneren senarra, arrakasta handiko abokatu gaztea, zintzoa, burlatia, zuzena eta sakelako telefonorik gabe galduta dagoena. Xanti pertsonaia Andoni Agirregomezkortak interpretatzen du; burdingilea lanbidez, Veronika emaztearen gonaren azpian bizi dena, lehertzen den arte. Teresa Andonegi da Veronika, kultura handiko etxekoandre aurrerakoia, tragoxka pare bat hartuz gero itxuraldatu eta erresumindu egiten dena.
Lau aktore ezagun, barreak eragingo dituztenak, baina baita buruari eragitera bultzatuko dutenak. Hori da Hondarribiko Udaleko Kultura departamentuak eta Txalo konpainiak iganderako egiten duten proposamena. 20:00etan hasiko da emanaldia eta sarrerak 10 euro balio du (5 euro, 18 urtetik beherakoentzat). Dagoeneko Arma Plazan eros daitezke, baita Interneten ere.
Aktore ezagunek osatzen dute ‘Jainko basatia’ obraren taldea
