Fitur azokara, Iruñeko eta Baionako harresiekin batera
Kultura, gastronomia eta harresiak uztartzen dituen proposamena aurkeztuko dute, Creacity proiektuari jarraipena emanez.
Azken urteetako ohiturari jarraituz, Madrilgo Fitur turismo azokara bidaiatuko du Hondarribiak aurten ere. Bihar, ostegunez, alkatea buru izango duen udal ordezkaritza bat joango da Madrilera, eta Iruñeko eta Baionako ordezkariekin batera egingo dute. Hiru hiriek abian duten Creacity proiektuaren jarraipen izango den asmoa aurkeztuko dute Madrilen. Hiri gotortuak balorean jartzeko xedea du Creacityk eta, aurkeztuko duten proposamenean, kultura eta gastronomia jarduerak harresietan burutzeko aukera zehazten da.
Nafarroako erakusketarian aurkeztuko dute proiektua bihar eguerdian, eta gastronomia dastaketa eskainiko dute ondoren. Bertaratzen direnek Nafarroako ardoa, Hondarribiko txakolina eta Baionako txokolatea dastatzeko aukera izango dute.
Arratsaldean, Erdi Aroko Hiri eta Hiribilduen sarearen Batzarrean parte hartuko du Hondarribiak. Besteak beste, sarearen urteko ekintzen plana zehaztuko dute.
Hiru hirietako ondare arkeologikoa balorean jarri nahi du Creacityk
