Plakarena "beste galdutako aukera bat" dela uste du Sare Antifaxistak
Erabaki hori hartzerako garaian, memoriaren inguruko taldeak eta biktimak ez dituztela kontuan hartu azaldu du.
Jose Antonio Santano Irungo alkateak jakinarazi duenez, larunbat honetan, hilak 17, plaka bat jarriko dute Etorbidearen zubian 36ko gerra eta frankismoaren biktimen omenez. Sare Antifaxistak, ordea, egitasmo hori beste galdutako aukeratzat jo du. Erabaki hori hartzerako garaian, memoriaren inguruko taldeak eta biktimak ez dituztela kontuan hartu azaldu du.
Irailean gertutako egoera errepikatu dela iritzi dio Sare Antifaxistak. Faxistek Irun hartu zutela 80 urte bete zireneko ekitaldian, orduan ere, udalak ez zituela memoriaren inguruko talde eta biktimak aintzat hartu gogorarazi du, eta, gainera, ekitaldiaren deialdia egiterakoan, jendeak suteagatik ihes egin behar izan zuela entzun behar izan zuela gaineratu du Sare Antifaxistak.
Ekitaldi horretan hainbat bizilagun, elkarte eta taldek parte hartu zutela gogora ekarri du, eta gauzak horrela ez zirela egiten ohartarazi ziotela alkateari. Mezu horren aurrean, entzungor jokatu duela Santanok iritzi dio.
Kotte Ezenarro eta Jose Antonio Santano Hendaia eta Irungo alkateak zintak jartzen joan den irailean Etorbidearen zubian egin zen ekitaldian.
Erlazionatutako edukia1936ko gerraren eta frankismoaren biktimen oroimenez plaka jarriko dute Abenida zubian
