Urrezko puntu bat
Hondarribia FE-ko lehen taldeak berdinketa lortu du Aretxabaleta indartsuaren etxean.
Ez zen partidarik errezana zulotik ateratzeko. Azken porroten ondotik puntuak biltzen hasteko beharra zuen Hondarribia FE-k, baina ez zirudien asteburu egokiena zenik horretarako. Izan ere, Aretxabaletan jokatzea tokatzen zitzaien berdeei, bigarrenaren etxean. Baina egin dute.
Atzo jokatu zuten Aretxabaletak eta Hondarribiak Ibarra futbol zelaian, eta hasierako emaitza berberarekin bukatu zen partida. Hondarribia puntu batekin itzuli da herrira, garaipen baten balioa duen berdinketa bat lortuta. Hondarribiarrek orain arte inork egin gabekoa lortu dute, Ibarratik golik jaso gabe itzultzea.
Sailkapenari begiratuta, balio handiagoa du lortutako puntuak. Azkenak, Martutenek, galdu egin du eta lau puntuko tartea ireki du haiekiko Hondarribiak. Baina aurretik dituen aurkariek puntuatu dute —Aloña Mendik eta Ostadarrrek irabazi, eta Beti Gaztek berdindu—. Hortaz, atzo galduz gero, aurkariak urrutiago izango lituzke taldeak (ikusi sailkapena).
Urteko azken jardunaldia
Hurrengo asteburuan urteko azken jardunaldia jokatuko dute Ohorezko Mailan, 15. jardunaldia izango dena. Hondarribiak garaipena nahi du, 2017a egoera hobeagoan hasteko. Eta partida egokia du horretarako, etxean azkenaren kontra jokatuko baitu. Martutenek zazpi puntu baino ez ditu, eta kanpoan jokatutako zazpi partidetatik sei galdu ditu.
Hiru puntuak Hondartzan geratuko balira, donostiarrentzat kolpe handia litzateke, eta Hondarribiak aurrerapauso handia emango luke. Aretxabaletan ezustekoa eman dute berdeek, orain etxean ezin dute hutsik egin.
