2-3 aste barru hasiko dira erabiltzen Palmera-Montero eraikina bertan plaza lortu duten 11 elkarte eta eragileak.
Eraikinean toki izango duten elkarteetako kideak, atzoko bisitan.
Atzo, astelehena, Palmera-Montero gizarte zentroan toki izango duten 11 elkarteek euren etxe izango dena bisitatu zuten. Azken ukituak ematen ari dira eraikinari, eta adibidez, elkarte horiek jasoko dituzten aretoek jada altzariak dituzte. Pedro Alegre Hiritarren Parte Hartzerako eta Informazio Gizarterako udal ordezkariak lagundu zituen bisita egiten herritarrak. Arbesko Errota auzo elkarteko kideak ere izan ziren bertan.
Behin gunea xehetasunez ezagututa, bertan egongo diren elkarteek 2-3 asteko epea izango dute areto berrietara lekualdatzeko. Gainera, atzo, Palmera-Monteroren funtzionamenduari buruzko hainbat alor adosteko aukera izan zuten udal ordezkariek eta entitateek, horien artean ordutegiak edo areto balioanitzak erabiltzeko arauak.
Herritarrek oro har izango dute aukera azpiegitura berria ezagutzeko Udalak adierazi duenez, ziurrenik abenduaren 12an zabalduko dizkiete irundarrei ateak eraikina bertatik bertara ikus dezaten, “egun hori izango baita Palmera-Monteron toki duten elkarteek bertan lan egingo duten lehen eguna”, esan du Alegrek.
Abendurako, ordea, ez da zabalik izango azpiegitura osoa. Mondragon Unibertsitatea jasoko duen espazioa atontzeko lanean ari dira oraindik.
Honako elkarte eta eragileek izango dute egoitza Palmera-Monteron:
- Bidasoko Kontsumitzaileen eta Erabiltzaileen Elkartea (ACUBI)
- Oiasso 2000 auzo elkarteen federazioa.
- Irun Hiritarren Foroa.
- Nicolas Gerendiain Errepublikazaleen Elkartea.
- Urritasun intelektuala dutenen Gipuzkoako elkartea (Atzegi).
- Aurreratu elkartea.
- Adiskidetuak elkartea.
- Luis Mariano Lirika Elkartea.
- Irun Hiria Musika Banda.
- Betti Gotti Euskal Kultur Taldea.
- Bidasoa Atletiko Taldea (BAT).
