Klasiko bat gaur Artalekun: Bidasoa Irun-FC Bartzelona

Bidasoa Irun urteko partida latzenaren aurrean izango da gaur, 20:30ean, Artalekun. Bartzelonak 101 partida jarraian irabazi ditu Asobal Ligan, 2013ko maiatzetik ez du galdu.

Urko Etxebeste Petrirena

Irun

2016/11/16

Asier Zubiria Bidasoaren atezaina. Argazkia: CD Bidasoa.

Egun handia biziko du gaur (asteazkena) Artaleku kiroldegiak. Asobal Ligako klasiko bat jokatuko dute bertan Bidasoa Irun eta FC Bartzelona taldeek. 20:30ean hasiko da partida. Nabaria da bi taldeen arteko aldea, sailkapenean, egituran, jokalarien taldean. Baina Jacobo Cuetara bidasoarren entrenatzaileak esan duenez, norgehiagoka ez dute era berezian prestatu, “gure estiloari fidel jokatuko dugu. Beste partidak bezala prestatu dugu Bartzelonaren kontrakoa. Gure erara jokatzen badugu, zerbait lortzeko aukera gehiago izango ditugu”. Asobaleko lider da Bartzelona. Ligan jokatutako hamar partidak irabazi ditu, aldeko 331 eta kontrako 248 golekin. Hori bakarrik ez, Asobalen 101 partida jarraian daramatza irabazten Kataluniako taldeak. Azken porrota 2013ko maiatzaren 18an jaso zuten blaugranek, Naturhouse La Rioja taldearen kantxan (33-11). Bidasoa sailkapenaren bederatzigarren postuan dago, hiruna partida irabazi eta berdinduta eta lau galduta. Bidasoak Bartzelonari azken aldiz 2001/2002 sasoian irabazi zion, 29-25. Artalekun, orotara, Asobalen 21 partida jokatu dituzte bi taldeek: horietatik bost Bidasoak irabazi ditu, beste bat berdinketarekin bukatu zen, eta gainontzekoak Bartzelonak irabazi zituen. Artalekuko harmailak, bazkideek ordaindu behar arren, goraino beteko dira gaur.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.