Indarkeria matxista txikitatik saihestu behar da
Hiriko ikastetxeetan hainbat tailer egiten hasi dira, nerabezarora oraindik ez diren haurrekin genero ikuspegia lantzen hasteko.
Gaurko Andreak Berdintasunaren Aldeko Elkarteak indarkeria matxista saihesteko bi iniziatiba aurkeztu ditu. Batetik, hiriko ikastetxeetan hainbat tailer egiten hasi dira, nerabezarora oraindik ez diren haurrekin genero ikuspegia lantzen hasteko. Lanketa haurrekin egitea, ordea, nahikoa ez dela iritzita, hainbat hitzaldi egingo dituzten guraso, irakasle eta interesa duen edonori zuzenduta.
Gaur goizean egin dute aurkezpena Gaurko Andreak elkarteko Irune Kastezubi presidenteak eta Itziar Gomez eta Ainhoa Ezeiza kideek.
Tailerrak Lehen Hezkuntza osoa eta DBH1 arteko haurrekin egiten ari dira. Aste honetan bertan egiten hasi dira Txingudi Ikastolan eta La Sallen, eta datozen asteetan jarraituko dute saio gehiagorekin. Egin dituzten saioetan esperotakoa aurkitu dute: “8 urtetik aurrera dagoeneko genero rolak oso barneratuta dituzte”, adierazi du Kastezubik.
Ezeizak gaineratu duenez —bera izan da saio horietan—, zerbait “oso erraz” jotzen dute matxistatzat, baina gero, gaian sakontzean, ez dakite zer den. Maitasun erromantikoa, kirolak edo fisikoaz hitz egitean agerikoa dela esan du, eta horri lotuta, bitxikeria bat kontatu du Kastezubik: “Neskek futbolean jokatzen dutela uste dute mutilekin ligatzeko”.
“Ez da nahikoa umeekin bakarrik lantzea”, esan du Gomezek. Helduek ere hainbat genero aurreiritzi barneratuta dituztela gogorarazi du, eta “motxila” hori kentzea komeni dela. Horren harira, aurkeztu dituzte hilabete osoan zehar egingo dituzten tailerrak. Jarraian ikus daitezke.
Egitaraua
- Hilak 14, astelehena: Berdintasuna ere ikasten da, hezkidetza kontua da, irakasleentzako tailerra eta hezkuntzako langileentzako hitzaldia, Elena Simon genero analista eta Berdintasun formatzailearekin. 18:30etik 20:00etara, Dunboako soinketa gelan.
- Hilak 15, asteartea: Emakumeak kontuan hartzea: kontatu eta izendatzea. Emakume elkarte eta interesa dutenei zuzenduta, Elena Simonekin. 10:00etatik 12:30era, Gaurko Andreak-en egoitzan.
- Hilak 15, asteartea: Eredu eta mezu ez sexistak gure seme-alabentzat. Hezkidetza osasungarria. Familia, guraso elkarte eta interesa duen guztiari zuzenduta. 18:30etik 20:00etara, Oiasso museoan.
- Hilak 16, asteazkena: Hezkidetza eta berdintasuna, genero indarkeria baztertzeko gakoak. Familia, guraso elkarte eta interesa duen guztiari zuzenduta. 18:30etik 20:00etara, OIasso museoan.
- Hilak 24, osteguna: Indarkeria ezkutuak: ezintasuna eta genero indarkeria. Xabier Peña Coca komisario ordea, psikologoa eta Genero Indarkerian aditua eta Maria Paz Giambastini Discapacidad Sin Fronteras elkarteko presidentea, kazetari italiar-argentinarra, idazlea eta irakaslea. 18:30ean, Oiasso museoan.
Ainhoa Ezeiza, Irene Kastezubi eta Itziar Gomez Gaurko Andreak elkarteko kideak.
