Astelehenean hasiko dituzte Hondarribiko Alde Zaharreko lanak

Lau fasetan egingo dituzte lanak, eta sei hilabete eta erdiz luzatuko dira.

2016/10/14

Javier Ugarte kalea.

Astelehenean hasi, eta sei hilabete eta erdiz luzatuko dira Javier Ugarte eta Santiago Konpostela kaleak berritzeko lanak. Zatika egingo dituzte. Hortaz, Hirigune Historikorako ibilgailuentzako dagoen sarrera-irteera bakarra moldatuko du udalak tarte horretan. Lanek 1,26 milioi euroko kostua dute. Lanen nondik norakoen berri badute bertan bizi direnek. Astelehenean Kultur Etxean batzarra egin zen xehetasunak herritarrei aurkezteko, eta iradokizunak jasotzeko. 70 bizilagunek jaso zituzten azalpenak, Txomin Sagarzazu alkatearenak, eta enpresa eraikitzaile nahiz egitasmoa idatzi dutenena. Alkateak baikor baloratu du asteleheneko batzarra, “bilera onuragarria izan zen. Obraren prozesu osoa azaldu genuen, eta bizilagunek zenbait alternatiba proposatu zituzten”. Hala, lanak hasten direnean beste bilera bat egitekotan gelditu da udala, alternatiba horien azterketaren berri emateko. Hala, besteak beste, bizilagunei lanak faseka egingo direla azaldu zieten. Honakoak dira zati horiek:

Lehen zatia: Santago Konpostela kalean hasiko dira lanekin. Beraz, bertako trafikoa Javier Ugarte kaletik joango da, eta Juan Labordatik igaroko da bi noranzkotan, semaforo bidez araututa. Abendurako bukatu nahi dute zati hori.
Bigarren zatia: Javier Ugarte kalearen goialdeari eragingo dio, Bista Eder etxearen aurrealderi zehazki. Hirigune Historikorako sarrerako eta irteerako trafikoa Santiago Konpostela kaletik bideratuko da (ordurako berrituta egongo da).
Hirugarren zatia: Javier Ugarte kalearen eta San Gabriel egoitzaren aurrealdearen artean egingo dituzte lanak. Ez da trafikoa etengo. Baina oinezkoen eta ibilgailuen arteko elkarbizitza egokia izan dadin neurriak hartuko dira. Bigarren eta hirugarren zatiak 2017ko Aste Santurako bukatzea espero du udalak.
Laugarren zatia: San Cristobal biribilgunetik Santiago kalearen sarreraraino egingo dituzte lanak. Trafikoan ez du eraginik izango.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.