Diseinuaren kultura zabaldu nahi dute Irunen

Diseinuaren kultura aurrera egiteko modu gisa ulertuta, jardunaldiak antolatu dituzte Kunsthal zentroak eta udalak elkarlanean.

Urko Etxebeste

Irun

2016/10/04

Udaleko eta Kunsthaleko ordezkariak gaurko agerraldian.

Udazkenean diseinuaren kultura zabaltzeko asmoa dute Irunen. Horretarako jarduerak antolatu ditu Kunsthal goi mailako diseinu zentroak, Irungo Udalaren laguntzarekin. Zentroaren ez ohiko programazioaren barruan kokatu behar da egitasmoa, CBA-DO izena du. Egitasmoaren izenak pistak ematen ditu. Hala, jarduera horiek gehienbat CBA udal liburutegian egingo dira. Programaren sustatzaileek esan dutenez, prestakuntzaren alorretik asko izango du egitasmoak, teknologia berriekin, diseinuarekin eta hizkuntza berritzaileekin lotutako tailerrak eginez. Jarduera guztiak irekiak eta doan dira, edonor joan daiteke. Gaur aurkeztu dituzte jarduerak Kunsthaleko zuzendari Gaizka Zuazok eta udaleko Kultura ordezkari Juncal Eizagirrek. Honakoak dira programatu dituzten jarduerak:

Hilaren 13an (osteguna): CBAn, Diseinua transformaziorako elementu gisa jardunaldiak. 10:30etik 13:30era hitzaldiak egingo dituzte, eta 18:00etatik 20:00etara mahai-inguruak.
Hilaren 15ean eta 22an, azaroaren 5 eta 19an, eta abenduaren 3an (larunbatak denak): Rock and Roll Circus izenburupean bost tailer egingo dituzte, familiei zuzenduak, diseinuaren eta XX. mendeko musika korronteen arteko harremanetan sakontzeko, 11:00etatik 13:00etara dira tailerrak, CBAn.
Azaroaren 12 eta 26an: CBAn, Tedece izenburupean, helduentzat eta taldeentzat, diseinuak dituen aukerak aztertzeko jarduerak. Azaroaren 12an 11:00etatik 13:00etara egingo dute; azaroaren 26an, 10:00etatik 13:00etara.
Abenduaren 22an: CBAn, familientzako tailerra kartelak egiten ikasteko, 17:00etatik 20:00etara.
Begirada Trukea: Kunsthaleko eta Donibane Lohizuneko Santo Tomas Lizeoko ikasleek parte hartuko duten egitasmoa da. Irungo zentroko ikasleek Hendaiako eguneroko alderdien argazkiak egingo dituzte, eta lapurtarrek gauza berbera egingo dute Irunen. Ondoren, bildutako lanekin erakusketa bat egingo dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.