Okupazio handia izan dute udan Irungo hotelek

Irungo eragileek udaren balorazio ekonomiko baikorra egin dute.

2016/09/22

Dies Oiassonisek bisitari asko erakarri ditu hirira.

Udak emandakoen balantzea egin dute gaur udalak, eta hirian turismoaren sektorearekin harremana dutenek. Hala, uztaila eta abuztua onak izan direla jakinarazi dute, eta horretarako datu objektibo bat jakinarazi: bi hilabete horietan hotelen eta agroturismoen okupazioa ia %90koa izan da batez beste, %87koa uztailean, %92koa abuztuan. “Apal, baina baikorrak izateko arrazoiak baditugu”, esan du Miguel Angel Paez Irungo Udaleko ordezkariak. Esan dutenez, datu horren irakurketa are hobea egin behar da jakinda uda ez dela izan eguraldi alorrean “oso aldekoa”. Turistak Irunen egotearen arrazoiak zeintzuk izan diren azaldu dute gaurko agerraldian Paezek, eta Irungo hoteletako ordezkari nahiz dendariek. Hala, Oiasso Museoak antolatzen dituen ekintzak, zehazki Dies Oiassonis, aipatu dute turistak hirira erakartzeko pizgarri bezala, “aurten bisitarien marka hautsi du jaialdiak”. Lapurriturri ingurura ere bisitari asko joan direla nabarmendu dute, eta hiriko turismo bulegoan izandako bisitak nabarmen hazi direla esan dute. Yon Gallardo Bidashop dendarien elkarteko presidenteak ere bere iritzia eman du agerraldian; izozkien denda baten arduraduna da. Haren hitzetan, eta nahiz eta haren ustez ere eguraldiak asko lagundu ez duen udan, hiriko merkataritza suspertzeko, indartzeko eta bultzatzeko ahaleginak ez du etenik izan behar, “lehiakorragoak izango gara horrela, eta bisitariek hori nabarituko dute”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.