Antzerki foruma egingo dute asteazkenean Katean
Landetxa auzo elkarteak hainbat ekitaldi antolatu ditu iraila eta urrirako.
Landetxa auzo elkarteak hainbat ekitaldi antolatu ditu iraila eta urrirako. Asteazken honetan bertan, Bakearen Eguna dela baliatuz, Y tu qué antzerki foruma egingo dute, 19:00etan, auzo elkartean.
Indarkeriak eguneroko bizitzan duen eragina ikustea izango da tailer horren helburua. Gatazka sozialek norberari eta besteei sortzen dizkieten sentimendu eta sufrimenduak aztertuko dituzte. Bertan parte hartzeko auzo elkartetik pasatu edo email bat bidali behar da. Gaurtik aurrera, etxez etxe banatuko dituzte esku orriak datozen asteetan egingo dituzten ekintzen berri emanez. Besteak beste, auzoa koloreztatzeko egitasmo bat aurkeztuko dute.
Bestalde, Auzoa bizituz izenpean auzoa koloreztatzeko egitasmo bat martxan jarriko dute, eta ostiral honetan eta hurrengoan (hilak 23 eta 30) egingo dituzte aurkezpenak, 18:00etan, auzo elkartean. Bi bilera horietan erabakiko dute zer margotu.
Auzotarrek gaurtik aurrera jasoko dute postontzian ekintza guzti horien gaineko esku orria.
Aste kulturala
Auzo elkartea dagoeneko prestatzen ari da urriaren 10etik 16ra egingo dute XXIII. Aste Kulturala. Egitaraua oraindik ez daukate osatuta, baina, auzo elkarteak aurreratu duenez, urriaren 15ean marmitako txapelketa egingo dute, eta dagoeneko izena eman daiteke auzo elkarteko tabernan.
Bestalde, ikasturte honetan egingo dituzten ikastaroak eta ordutegien berri eman du auzo elkarteak: afrikar dantza, aretoko dantzak, capoeira, eskola laguntza, garapen pertsonala, gimnasia, gitarra, helduentzako gimansia, hatha yoga, ingelesa, Interneta eta mugikorrak, joste lanak, karatea, kizomba, marrazketa eta margoketa, mozketa eta jantzigintza, perkusioa, pilates eta abdominal hipopresiboak, psikomotrizitatea, haur eta helduentzako sormen tailerra, ukelelea, wing tsun, haurrentzako xakea eta zumba eskainiko dituzte.
‘Y tu qué’ antzerki foruma (Argazkia: Donostia Kultura)
