Sexu erasoak ekiditeko prebentzio kanpainak eskatu ditu Irungo EH Bilduk

Hirian eta Euskal Herrian izan diren sexu erasoak gizarte mugimenduak salatu dituela esan du koalizioak, baina udalak "lanketarik egin ez izana" salatu du.

Urko Etxebeste Petrirena

Irun

2016/07/14

Jaien aurretik eta bitartean kanpainak egin daitezela eskatu du EH Bilduk.

Irungo EH Bilduren udal taldeak udalari eskatu dio bai hiriko jai nagusietan zein auzoetakoetan eraso sexisten gaineko prebentzio neurriak har ditzala. Kanpaina horiek jaien aurretik eta horiek bitartean egin behar direla uste du koalizioak, “erasoak ekiditeko kanpaina horiek martxan izan behar dira”. Bide horri jarraituz EH Bilduk uste du herritarrak kontzientziatu eta ahaldundu egingo direla, “eta sistema patriarkal honek eragiten dituen sexu erasoen aurrean batzera eramango dituzte herritarrak”. Horrela, zentzu horretan Irungo Udalak “hutsune nabarmena” duela uste du koalizioak, “ezin gaitezke hurrengo urtean lantzeko asmoa dagoen IV. Berdintasun Planaren zain egon. Jada lan honekin hasi beharko genukeela uste dugu, berandu baikabiltza”. Plana osatu zain egon gabe, prebentzio lana egiteko Berdintasun Aholku Batzordearen markoa erabiltzea eta kanpainak bertan lantzea eskatu du EH Bilduk. Erasoak Prebentzio kanpainen eskaera azken egunetan Euskal Herrian eta Irunen izan diren sexu erasoen harira egin du koalizioak. Gizarteak horiek salatu egin dituela adierazi du, “Irunen eragile sozialek deitutako protesten bidez egin dira erasoen kontrako mobilizazioak. Baina larria deritzogu udaletxetik gertaera horiek ekiditeko lanketarik egin ez izana”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.