Ezintasunagatik, adinagatik edo beste arrazoiren batengatik mugikortasuna murriztuta duten pertsonek itsasoan sartzeko aukera izango dute hamargarrenez.
Hamar urte bete ditu Oztoporik gabeko bainua programak
Ostegunean abiatuko da Oztoporik gabeko bainua programaren beste ekitaldi bat. Gipuzkoako Kirol Egokituko Federazioaren ekimena da, ondoan Kutxa Fundazioa, Hondarribiko Udala eta beste hainbat laguntzaile izan dituena. Pertsonaren mugikortasuna edonolakoa izanik ere, hondartza guztion esku jartzeko helburuarekin jaio zen, eta, hamar urte pasata, zaila da imajinatzea Hondarribiko hondartza programa hori gabe.
Ezin daiteke esan orain artekoak bereziak izan ez direnik, baina aurten hamar urte beteko ditu programak eta, hori horrela, ospatu egin nahi izan dute, egindakoa balioan jartzeko. Ekitaldi xume baina hunkigarria egin dute gaur eguerdian Hondarribiko Itsas Etxea Auditoriumean eta bertan izan dira, besteak beste, Igor Otaegi Gipuzkoako Kirol Egokituen Federazioko egungo presidentea, Mikel Izagirre duela hamar urtekoa eta programaren sortzailea, Pepelu Mugika aurreneko zazpi urtetako koordinatzailea, Txomin Sagarzazu Hondarribiko alkatea, eta programaren hamarkadan arduradun, laguntzaile, begirale eta erabiltzaile izandako pertsona asko.
Ostegunetik eta irailaren 14ra bitarte, ezintasunagatik, adinagatik edo beste arrazoiren batengatik mugikortasuna murriztuta duten pertsonek hondartzako gainontzeko erabiltzaileek bezala itsasoan sartzeko aukera izango dute. Goizeko hamaiketatik arratsaldeko seietara eskaintzen da zerbitzua, eta gaurko ekitaldian Izagirrek nabarmendu duenez, zerbitzu integrala da: “gozatzeko aukera, uretara iristeko erraztasunak eta lan talde kualifikatua, hori guztia eskaintzen du Oztoporik gabeko bainua programak”.
Etzi abiatuko da programaren hamargarren edizioa eta, azken urteotan bezala, mila pertsona ingururi erantzuna emango die. Hondarribiko alkateak zorionak eman die programa posible egiten dutenei, eta eskerrak herriari egin dioten ekarpenagatik: “Herriari pertsona gehiago ematen dio programak, eta hondartzari aniztasuna. Dudarik gabe, azken hamar urteetan gure hondartza aberastu egin du ekimenak”.
Programako sortzaile, arduradun, laguntzaile, begirale eta erabiltzaileak elkartu dira Itsas Etxean
Mina murriztu, mugikortasuna hobetu
Ekitaldi hunkigarri batekin ospatu dute etzitik irailaren 14ra arte hamargarren urtez pertsona guztiek Hondarribiko hondartzan bainatzeko aukera izango dutela. “Gaurko irribarreak ikustea besterik ez dago merezi duela jakiteko”, adierazi du Itziar Igartua Kutxa Fundazioko ordezkariak.
Ana Ortizena zen irribarre horietako bat, Gipuzkoako Kirol Egokituko Federazioak 2006an abiatutako programari esker bederatzi urtez itsasoan bainatzeko aukera izan du Ortizek, eta gaur eskerrak emateko aukera izan du: “Uretan bainatzeari esker nire minak murrizten dira, eta nire mugikortasuna hobetu. Programa hau gabe, ni bezalako pertsonek ezingo lukete bainatu edo hondartzaz gozatu”.
Gainontzeko pertsonak bezala, ostegunetik berriro gozatuko du Ortizek Hondarribiko hondartzan.
Azken berriak
Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.
Hasi saioa HITZAkide gisa
Saioa hasten baduzu, HITZAkide izatearen abantailak baliatu ahal izango dituzu.
HITZAkide naiz, baina oraindik ez dut kontua sortu SORTU KONTUA
Zure kontua ongi sortu da.
Hemendik aurrera, zure helbide elektronikoarekin eta pasahitzarekin konektatu ahal zara, HITZAkide izatearen abantaila guztiak baliatzeko.
Ezagutu HITZAkide izatearen abantailak eta aukeratu HITZAkide izateko gustuko modalitatea
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
Ezagutu HITZAkide izatearen abantailak eta aukeratu HITZAkide izateko gustuko modalitatea.
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
