[Argazki galeria] Baserritarrena da Irun

Irun beste bat da gaur. Alardeen ondoren, baserritarrena da gaurko eguna, sanmartzialen azken eguna.

2016/07/01

Ganadua ederki asko atondu dute gaur.

Zapi eta txapel gorriak garbitzera bota, eta sanmartzialen azken egunean sartu dira gaur Irunen. Egun seinalatua da gainera: Baserritarren Eguna. Urdanibia plaza inguruan dago giroa, goizean ganadu erakusketa eta lehiaketarekin, herri kirolen erakustaldiarekin, eta jaki eta edari goxoen dastaketarekin. Arratsalderako geldituko dira Urantzuko profesionalen pilota partidak (18:00etan), Bidasoko XXV. Dantza Solte Txapelketa (18:00etan, Urdanibian) eta ondorengo herri erromeria. 22:45ean bukatuko dira sanmartzialak, su artifizialekin. Giro ederra goizean Urdanibian. Euskal giroa, bai itxuran, zein euskal hiztunen kopuruan: euskara nagusi zen Urdanibian bertakoek eta inguruko herrietatik etorritakoek hizkuntza hori erabili dutelako batik bat egunari, sanmartzialei, beste kutsu bat emateko. Hobea. Ganadu lehiaketa egonik, behi ale ederrak ikus zitezkeen: izan da baserritarrik ile lehorgailua eta orrazia hartu, eta behia txukun-txukun edertu duenik. Saria zegoen jokoan eta. Bien bitartean, aizkolariek, harri jasotzaileek eta trontzalariek indar erakustaldia egin dute, Bidasoko trikitilariek giroa jartzen zuten bitartean, eta herritarrek txosnetan mokadutxoa jan eta tragoska edaten zuten bitartean. Goiz pasa galanta. Ondokoak, goizeko giroaren hainbat irudi dira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.