Auto ilarak arintzeko neurriak hartuko ditu Bidegik AP-8an

Biriatuko nahiz Kateago ordainlekuen inguruan hainbat eremutan ezingo dute ibilgailuek geldirik egon, AP-8ra errazago sartu eta irteteko. Auto ilarak etenik gabekoak dira egunotan.

Urko Etxebeste Petrirena

Irun

2016/06/21

Biriatuko ordainlekuaren ondoan margotuko dituzten bi eremuak dira honakoak.

AP-8ko ordainlekutik abiatuta sortzen diren ibilgailu eta auto ilarak arindu asmoz, Bidegik inguru horretan lau zatitan seinale berriak (errepidean margotuta) jarriko ditu. Horrela, lau zati horietan (30 metrokoa bakoitza) autoak ezin izango dira geldirik egon. “Dama jokorako taularen itxura izango dute”, zehaztu du Bidegik. Goiko argazkian hobeto ikus daitezke. Horrela, galtzadako seinale horien bitartez, ibilgailuak AP-8tik Irun-Hondarribia norabidea hartzeko (N121-Ara) erraztasun gehiago izango dituzte (Biriatuko ordainlekuan jada); gainera, Irun-Katea sarreratik (bertan ere ordainlekua dago) ere errazago sartu edo atera ahal izango dira ibilgailuak (Nafarroatik datozen eta Ipar Euskal Herrira doazen autoentzat). Gipuzkoako Foru Aldundiko Bide Azpiegituretako diputatu Aintzane Oiarbidek aitortu du neurri horiekin ez direla zeharo konponduko “jendarmeriako polizia kontrolek eragiten dituzten kilometrotako ilarak”, baina autoak AP-8ra sartzeko edo bertatik irteteko erraztasun handiagoa izango dutela jakinarazi du. Bihar (asteazkena, hilak 22), gauez, margotuko dituzte eremu horiek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.