[Bideoa eta argazkiak] Bidegorri duina eta segurua nahi dute

Txirrin, txirrin, bidegorria egin. Horixe gaur hamarnaka hondarribiarrek bidegorri duin eta seguru bat eskatzeko erabili duten leloa.

Ikerne Zarate

Hondarribia

2016/06/18

Bizikletak prestatzen martxa abiatu aurretik.

Txirrin, txirrin, bidegorria egin. Horixe gaur hamarnaka hondarribiarrek bidegorri duin eta seguru bat eskatzeko erabili duten leloa. Abotsanitzek Hondarribiko bidegorri sare seguru eta duina eskatzeko abiatu duen dinamikaren barruan bizikleta martxa egin dute gaur. EH Bilduk ere bat egin du deialdiarekin. Beharra dagoela bidegorri sare erabilgarri eta funtzionala sortzeko esan dute bidegorriaren alde sortu berri den plataformako kideek. Joan den astean egin zuten lehen bilera irekia, eta asteazkenerako egin dute deialdia berriz ere. “Momentuan badaude bidegorri zatiak Hondarribian, baina ez daude ongi lotuta batzuk besteekin. Ikasleek eskolaraino bizikletaz joan daitezen aukera izan dezaten nahi dugu, besteak beste”. Amute eta Mendelu artean zentratu dira, lehenik, “hori iruditzen zaigu punturik kritikoena. Gainera Irunekin lotuko bagenu, Hondarribitik bizikletaz joan daiteke jendea Irunera, bertan trena hartu eta unibertsitatera joateko. Donostian bada sare ederra ibiltzeko”. Irundik Hondarribira udaran hurbiltzen direnei ere erantzungo liekeela bidegorri sare duin eta seguru batek gaineratu dute, “Amuten espaloi gainetik joaten dira bizikletarekin eta oinezkoekin talka egiten du, kexak sortzen dira. Errepidetik joaten ausartzen direnek berriz, istripuak izateko arriskua dute”. Erabiltzaile kopuru bat badagoela argi dute, baina bidegorri sare seguru eta duina ez izateak erabiltzaile izango liratekeen beste asko bizikleta etxean uztera behartzen dituela salatu dute bildutakoek, “bidegorri funtzional batekin bikoiztuko litzateke bizikleta erabiltzaileen kopurua”. Amuteko futbol zelai pareko aparkalekutik abiatu da bizikleta martxa 12:00etan, Mendeluraino joan dira eta biribilgunea eginda Amute Zaharreko bidegorritik udaletxera jo dute, eta portura jaitsi dira Butroe pasealekutik. Amaitzeko, portuan ibili dira. “Bizikletaren erabileraren alde jende bat lanean hasi dela erakutsi nahi dugu”. Hamaiketakoarekin amaitu dute gaurko protesta. Martxa anitza gaurkoa, haur gazte eta heldu bildu dituena bidegorri sare duin baten alde.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.