EH Bilduk bat egin du bidegorri sarea osatzeko eskaerarekin

Bidegorri sarea modu funtzionalean osatu eta egokitu behar dela uste du EH Bilduk

2016/06/16

Bizikleta garraiorako ere badela adierazi du EH Bilduk

Hondarribiko EH Bilduk bat egin du Abotsanitzek Hondarribiko bidegorri sare seguru eta duina eskatzeko abiatu duen dinamikarekin, gaiaren gaineko iritzi propioa emanaz. Horren barruan, bi mobilizazio egingo dituzte bihar eta etzi: bihar, Amuteko zubian elkarretaratzea egingo dute (19:00etan), eta etzi, berriz, Amutetik 12:00etan abiatuta bizikleta martxa egingo dute; martxarekin bat egiteko eskatu die herritarrei. Hondarribiko EH Bilduren ustez, udal gobernuak bizikleta aisiarako eta paseorako elementu gisa ikusten ditu, «ondorioz, bidegorri sarea osatzea bigarren mailako lantzat hartu izan du». Horregatik, koalizioaren ustez, «bizikleta garraio alternatiba bezala modu serioan hartzeko» garaia da, «demostratua dago bizikletaren erabilera sustatzeak herri barruko desplazamenduetarako kotxeen erabilera gutxitzen duela». Hori horrela izan dadin neurri zehatzak proposatu ditu EH Bilduk: herriko bidegorri sarea modu funtzionalean osatzea eta egokitzea; bidegorriak ikastetxe eta lan eremuetaraino iristea, eta bizikletentzat aparkaleku bereziak instalatzea zerbitzu, komertzio eta aisia guneetan. Hori guztia egiteko erakundeen borondate politikoa behar dela ohartarazi du EH Bilduk, eta Abotsanitzen eskaerarekin bat eginez, bizikleta garraiobide gisa hartuko duen mugikortasun plangintza beharrezko ikusi du.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.