Erabakitzeko eskubidearen alde daudela erakutsi dute gaur hondarribiarrek.
Parte hartze handia izan du gaurko ekitaldiak. Irudian, Goxoki abesbatzaren saioa
Gure Esku Dago taldearen deiar erantzunez, ehundaka hondarribiar elkartu dira gaur San Pedro kalean erabakitzeko eskubidearen alde egin den ekitaldi sinbolikoan. Bihar 34 herritan egingo diren galdeketei babesa eman diete, eta etorkizunera begira indarrak neurtu dituzte. Ekitaldi plurala izan da gaurkoa, kolore askotakoa, baina denen artean izokin kolorea nagusitu da, erabakitzeko eskubidearen aldeko plataformaren elastikoen kolorea.
Hamabi eta erdietan hasi eta ordubiak arte festa giroa zabaldu du Gure Esku Dago-k Portuan. Abiyuan txarangak, Goxoki abesbatzak, muxiko taldeak, institutuko buruhandiek… atxikimendu asko lortu dituzte gaurko ekintzarako, eta herriko hiru aldrdi nagusitako ordezkariak (EAJ, Abotsanitz eta EH Bildu) hurbildu dira babesa agertzera.
Hautetsontzi erraldoia eraiki dute San Pedro kale erdian, eta bertan, erabakitzeko eskubidearen alde daudela adierazteko aukera izan dute herritarrek. “2018an guk erabakiko dugu”, esan dute gaur hondarribiarrek, eta hilaren 12an egingo den Eskuen Egunera biltzeko deia egin diete bidasoar guztiei.