Irungo arlo anitzetako ia 300 pertsonaia ezagunek bat egin dute erabakitzeko eskubidearen aldeko adierazpenarekin.
Irungo aurpegi ezagunak bildu ditu Gure Esku Dagok gaur eguerdian, Oiasso museoan. Arlo ezberdinetako pertsonak ikusi ahal izan dira: kirola, kultura, hezkuntza, politika… Guztiak, ordea, badute zerbait komunean: “Erabakitzeko eskubideak batzen gaitu”, adierazi dute guztiek sinatutako adierazpenaren bidez.
Guztira, Irungo ia 300 pertsonaia ezagunek bat egin dute erabakitzeko eskubidearen aldeko adierazpenarekin. Besteak beste, Ander Elosegi palistak, David Zurutuza Realeko jokalariak, Real Union eta Bidasoa eskubaloiko hainbat jokalarik, Elena Berazadi Txingudi Ikastolako lehendakari ohiak, Josune Gomez (EAJ), Izaskun Morondo (EH Bildu) eta David Soto (Ahal Dugu) zinegotziek, Agus Hernan Antxeta Irratiko lehendakariak, Itziar Gomez aktoreak, Ainara Maya Urroz idazleak, Jabier Muguruza eta Galder Izagirre musikariek, Mertxe Trantxe historialariak, Iker Callao LABeko sindikalistak, eta beste abar luze batek.
“Irundarrok gainontzeko euskal herritarrek bezala, gure herriaren etorkizun politikoa erabakitzeko eskubidea dugu”, defendatu dute adierazpenean. Bide hori irundar guztiak elkartuta egiteko garaia dela gaineratu dute, “herritar bakoitzaren ahotsa kontuan hartuz gauzatzen baita”.
Hala, hiru eskaera zehatz egin dute. Batetik, hainbat arlotan Irunen erreferentzia diren lagunei eskatu diete Adosgune edo Foro bat sortzeko “bide hori nola egin adosten hasteko”. Horrez gain, euskal gizartearen ordezkari nagusiei itunak eta akordioak bultza ditzatela galdegin diete, “euskal gizarteak erabakitzeko eskubidea lortzeko”. Eta azkenik, hurrengo igandean, hilak 12,
Gure Esku Dagok antolatutako Eskuen Egunean parte hartzeko deia egin dute.
Gure esku dagok Irungo hainbat pertsonaia ezagun bildu ditu erabakitzeko eskubidearen alde.