"Eskualdeko errealitate sozioekonomikoa ezagutu eta agentziaren ekintza plana birkokatu" nahi dutela azaldu du Miguel Angel Paezek.
Bidasoa Bizirik-ek 2015eko memoriaren aurkezpena egin du gaur, eta horrez gain, 2016rako dituen erronken berri eman du. Horietako bat plan estrategikoa egitea izango da.
Horren berri eman dute gaur Miguel Angel Paez Bidasoa Bizirik-eko presidenteak eta Juan Mari Altuna presidenteordeak. Plan estrategiko horren bidez, “non dauden eta nora joan nahi duten” jakin nahi dutela azaldu du Altunak. “Eskualdeko errealitate sozioekonomikoa ezagutu eta agentziaren ekintza plana birkokatu” nahi dutela zehaztu du Paezek.
Plan horren txostena udazken alderako prest edukiko dutela aurreratu du Bidasoa Bizirik-eko presidenteak.
Bigarren erronka nagusia OarsoBidasoko Industrialdeak-ekin batera lan egitea izango da. Jarduera ekonomikoentzat lur berria lortzea geroz eta zailagoa dela esan du Paezek, eta hori dela eta, lur horien erabilera sustatu nahi dutela esan du, “pabilioi horietako batzuk hutsak edo okupazio tasa txikia” dutela kontuan hartuta.
17.000 arreta
2015ari dagokionez, enpleguarekin lotutako entitateen arteko kolaborazioa eta enpresen sarearekin harremana indartu dutela nabarmendu du Paezek. Guztira, 16.800 aldiz eskaini dute arreta El Espazio bulegoan, bai kontsulta baita tailerretan ere.
Enpleguari dagokionez, 468 lan eskaintza kudeatu dituzte bulegoan, eta horrez gain, Bidasoa Bizirik-ek antolatutako Enpleguaren Astean (bi aldiz egin da) 234 lan eskaintza kudeatu dituzte.
Bidasoak %16ko langabezia tasa du, eta langabe profila emakumea eta 45 urtetik gorakoa da. Paezen arabera, ez dira egokitzen eskaera eta eskaintza askotan, enpresek kualifikazio maila handiko eta oso lan perfil zehatzak eskatzen dituztelako. Edonola ere, langabearen perfil hori kontuan hartuta, hainbat ekintza egin dituztela gogorarazi du, esate baterako, formazioa eskainiz (sukaldaritzako profesionaltasun ziurtagiriarekin) eta enpresekin bitartekari lanak eginez.
Zentzu horretan, 240 enpresekin aritu dira elkarlanean, eta 86 enpresa txikiren nazioarteratzea sustatzeko lanean aritu da. Elkarlanaren emaitza izan da Agglomeration Sud Pays Basque erakundearekin egin duten lankidetza, mugaz gaindikoa.
Ekintzaileentzako babes, aholkularitza eta formazio ekintzak aurrera eraman dituztela gaineratu du Paezek, eta 824 lagunek jaso dutela arreta. Guztira, 155 enpresa berri egin dituzte eta 175 enplegu sortu.
Iaz egindako bi jarduera ere nabarmendu dituzte: Krea Bidasoa topaketa, ekintzailetza, berrikuntza eta sormenaren alorrekoa; eta Irun Open Innovation, enpresa, ekintzaile, sortzaile eta entitate publiko eta pribatuen arteko topagunea.
Azkenik, turismo alorra ere jorratzen du Bidasoa Bizirik-ek, eta hala, turismo bulegoetan 106.000 mila kontsulta egin zirela adierazi du, eta horietatik, 40.000, webgunean. Zentzu horretan, sare sozialetan Visit Hondarribia Irun oinarrizkoa izan dela nabarmendu dute.
Juan Mari Altuna eta Miguel Angel Paez Bidasoa Bizirik-eko presidenteordea eta presidentea, hurrenez hurren.