Sagardo Egunetik Boliviara
Larunbat honetan izango da Sagardo Eguna, Urdanibia plazan, 18:00etatik aurrera. Aurten ere, bildutako dirua Taupadak elkartera bideratuko dute.
Aurten ohi baino beranduago zipriztinduko da sagardoz Urdanibia plaza. Urtero bezala, maiatzeko bigarren larunbatarekin egingo dute Sagardo Eguna, 21.ena, Irunen (18:00etatik aurrea), baina aurten 14a tokatu da. “Batek baino gehiagok galdetu digute ea aurtengo Sagardo Eguna pasatu den”, esan du Ola sagardotegiko Iñaki Bengoetxeak. Ez, bada, larunbat honetan izango da.
Gaur goizean egin dute aurkezpena Ola sagardotegian bertan Juanjo Aldako Kurpil Kirolak gastronomia elkarteko presidenteak, Monica Martinez udaleko Kooperazio ordezkariak eta Fernando de la Hera Taupadak elkarteko presidenteak, Bengoetxearekin batera.
Festak urteroko zenbakiak izango ditu: 4.000tik gora botila askatuko dituzte irundarren gozamenerako eta 3.000 tiket jarriko dituzte salmentan, 6 euroan. Horrek eskubidea emango dio erosleari 10 aldiz basoa betetzeko, pintxo bat jateko eta zapia eskuratzeko. Horrez gain, hainbat zozketa izango dira. Egun horretan 100dik gora boluntariok (taberna eta elkarteetakoak) lana egingo dute bakailao tortilla eta txorizo pintxoak prestatzen.
Urtero etekina ateratzen du Sagardo Egunak, “1.100 euro inguru”, De la Herak zehaztu duenez, eta horiek Taupadak elkartera zuzenduko dira, ohi bezala. Taupadak elkartea Boliviako San Ignacio Moxos herriko musika eskola finantzatzeko izango da.
De la Herak azaldu duenez, musika eskolak berak ez du baliabide propiorik, eta horrenbestez, haren egonkortasuna bermatzeko oilategi bat sortu nahi dute, arrautzen salmentatik musika eskola finantzatzeko.
Bidasoko ordezkari bakarra
Hogei sagardogilek parte hartuko du, eta bakarra izango da Bidasokoa, Ola sagardotegia. Bengoetxea, zentzu horretan, atsekabetuta azaldu da: “Lehen Hondarribiako Sagarzazuk parte hartzen zuen, baina itxi zuen. Irunek ordezkaritza izatea ondo dago, baina Hondarribiak ere izan duen iraganarekin, eta Ama Guadalupekoa, gainera, sagardoaren santua izanda, ordezkaritza izan beharko luke”.
Guztien artean, Labela duten bost sagardotegik parte hartuko dute, Olak kasu. Hain zuzen, ekoizpenaren %100 etxekoa du Irungo sagardotegiak, Bengoetxeak azaldu duenez.
Sagardo egunaren aurkezpena Ola sagardotegian. Juanjo Aldako, Monica Martinez, Fernando de la Hera eta Iñaki Bengoetxea
