Bidasoko Itzulia, sub 23 txirrindulari onenentzat

Bihar (asteazkena) hasiko da Bidasoko Itzulia. Lau etapa bizi-bizi izango dituzte aurretik sub 23 mailako 140 txirrindulariek.

Urko Etxebeste

Hondarribia,Irun

2016/05/03

Bidasoko Itzuliko iazko etapa baten irudia. Argazkia: Antxetamedia

Bihar (asteazkena) hasiko da Irunen Bidasoko 44. Itzulia. Sub 23 txirrindularitza mailako etapako lasterketarik garrantzitsuenetakoa da Bidasoa Itzulia Elkarteak antolatzen duen proba. Bertan, hortaz, maila horretako txirrindulari onenak egongo dira. Lau etapakoa izango da aurten ere itzulia, zein baino zein erakargarriagoa. Hasteko, iazko eskema errepikatuko da biharko lehen etapan: Irunen hasiko da, eta Igantziko (Nafarroa) Irrisarri Land abentura parkeko maldan bukatuko da. Handik aurrera beste hiru etapa geldituko zaizkie txirrindulariei. Orotara 20 taldek emana dute izena Bidasoko txirrindularitza proba klasikoan. Bakoitzean zazpi kirolari egongo dira, beraz, azken orduko bajarik ez badago, 140 txirrindulari gazte izango dira bihar Urdanibia plazako irteeran. Larunbateko etapa gogorrarekin bukatuko da lasterketa. Ondokoak dira etapak:

Lehen etapa (hilak 4, asteazkena): Irun-Irrisarri Land (107,1 kilometro). Etapa gorabeheratsua, baina goi mailako porturik gabe. Bukaera, maldan gora. 14:30ean aterako dira partaideak Irungo Urdanibia plazatik. Igantziko parkera ordutegirik onenean 17:03an iritsiko lirateke.
Bigarren etapa (hilak 5, osteguna): Hendaia-Hondarribia (123 kilometro). Itzuliaren profila nahasten hasten da. Besteak beste, etapa honen azken kilometroetan, Jaizkibel igoko dute txirrindulariek, Hondarribiko Harresilanda kaleko helmuga baino kilometro gutxi batzuk lehenago. 14:30ean hasiko da, 17:27-17:44 inguruan bukatzeko antolatzaileen aurreikuspenen arabera.
Hirugarren etapa (hilak 6, ostirala): Orio-Orio (128 kilometro). Gipuzkoako kostaldeko herriko Arrantzaleen kalean hasi, eta bertan bukatuko da itzuliko etaparik luzeena. Tartean, bigarren mailako bi mendate (Mandubia eta Etumeta) eta helmugatik gutxira hirugarren mailako bat (Meagas) izango dituzte gainditzeko lasterkariek. 14:30ean abiatuko dira partaideak, 17:53an gehien jota bukatzeko (rutometroan ordutegirik mantsoena da).
Laugarren etapa (hilak 7, larunbata): Irun-Irun (77,5 kilometro). Etapa motza, eta latza azkena. Ficoban hasi, eta Colon pasealekuan bukatuko da. Tartean, hirugarren mailako mendate bat (Gurutze) eta hiru lehen kategoriakoak: Aritxulegi, Agiña eta Erlaitz. Azken etapa honetan erabaki daiteke, askotan gertatu bezala, itzulia. 15:00etan abiatuko dira lasterkariak Ficobatik, eta 17:00 inguruan bukatuko da.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.