EAJ eta EH Bildu alardeetako konpainia parekideak babesteko ados jarri dira

Eusko Legebiltzarrak, EAJk eta EH Bilduk hitzartutako bi erdibideko zuzenketa onartu egin ditu aho batez, horrela Irungo eta Hondarribiko alarde eta konpainia parekideak babestuz

Urko Etxebeste Petrirena

Irun

2016/04/27

Jaizkibel Alardea Hondarribiko jaiak 2015

Jaizkibel konpainia, Hondarribiko udaletxe paretik desfilatzen

Eusko Legebiltzarrak, EAJk eta EH Bilduk hitzartutako bi erdibideko zuzenketa onartu egin ditu aho batez, horrela Irungo eta Hondarribiko alarde eta konpainia parekideei babesa emanaz: zuzenketako batek eskatzen du alardeekin harremana duten alde guztiek elkarrizketarako bidea irekitzen has daitezela, eta besteak alarde eta konpainia parekideekiko “begirune faltak” baztertzea aldarrikatzen du, adibidez, Hondarribiko Kale Nagusian jartzen dituzten plastiko beltzei erreferentzia eginez Berdintasun Legean oinarritutakoak izan dira gaur Gasteizen hartu dituzten erabakiak. EH Bildu izan da horien bultzatzaile, nahiz eta EAJrekin lortutako akordioen ondoren osotasunean ez onartu koalizioak nahi zuena. “Berez zertxobait motz geratzen den arren gaur onartutakoa, egia da tunelaren amaieran argia ikusteko balio dezakeela”; Diana Urrea EH Bilduren legebiltzarkidearen hitzak dira horiek. Hark defendatu ditu koalizioaren nahiak Gasteizen, eta bertan onartutakoa “alardeak kudeatzen dituzten erakundeetara” zabaldu behar direla uste du. Gaur egunez, ez Irungo nahiz Hondarribiko alkateek ez diete harrerarik egiten Irungo Alarde Parekideari eta Hondarribiko Jaizkibel konpainiari, hurrenez hurren. Gainera, Urreak zoriondu ditu “hainbeste urtean euren eskubideak aldarrikatzen” aritu diren pertsona guztiak, bereziki emakumeak: “Eskertzekoa da egin duten lana”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.