Ikasbasket Hondarribiak hilaren 30ean eta maiatzaren 1ean jokatuko du lauko finala
Finalerdia Añorgaren kontra jokatuko du. Beasainen jokatuko da lauko finala eta talde bakarra igoko da 2. Euskal Ligara.
Hondarribia Ikasbasket saskibaloi taldeak lehen postuan bukatu du emakumeen Gipuzkoako Ligako igoera fasea (ikusi sailkapena). Azken partidan Take Aralarren kontra erraz nagusitu ziren hondarribiarrak (74-24), eta datorren urtean 2. Euskal Ligan jokatzeko aukera asko dituzte. Hilaren 30ean eta maiatzaren 1ean jokatuko da lauko finala Beasaingo Antzizar polikiroldegian, Euskal Ligara igoko den talde bakarra zehazteko. Larunbatean bi finalerdiak jokatuko dituzte, eta igandean finala.
Lehen finalerdian, Ikasbasketek Añorga izango du aurkari eta, dena ongi, igandeko finalerako sailkatu beharko lukete berdeek, baina kontuz ibili beharko dute, igoera fasean galdutako bi partidetako bat donostiarrek kontra galdu baitzuten. Irabaziz gero, finalean Bera Bera Gros edo Antigua-Luberriren kontra jokatu beharko du Hondarribiko taldeak, igoerako postu bakarra helburu.
Ligaxka amaitzeko hiru jardunaldi falta zirela sailkatu ziren hondarribiarrak, eta azken partidetan lauko finalean aurkari izango dituzten taldeak ezagutu dituzte.
Azken partida Bera Bera-Grosen kontra galdu arren, Antigua Luberri izan da multzoko bigarrena, eta Grosekoek hirugarren postuan bukatu dute. Hori horrela, berriro elkarren aurka aritu beharko dira Beasainen, lauko finaleko bigarren finalerdian.
Laugarren tokian Añorga sailkatu da, larunbatean Beasaingo Arri BKLren kontra hil ala biziko partida irabazita. Hortaz, Ikasbasketen kontra jokatuko du Añorgak eta, Beasaingo taldea, aldiz, bere kiroldegian egingo den emakumeen saskibaloiko Gipuzkoako Ligako lauko finaletik kanpo geratu da.
Lehen urtean mailaz igo nahi du Hondarribia Ikasbasket taldeak
