Hondarribitik Greziara, Nafarroako hiriburutik
Larunbatean Iruñetik 60 kaxa handi iritsi ziren Hondarribira, Emekik abiatutako kanpainaren berri izan eta gero.
Hondarribitik Greziara errefuxiatuentzako arropak eramatera joango den kamioiaren erdia baino gehiago bete da dagoeneko. Emeki elkartea ari da bilketa kanpaina koordinatzen, dozenaka boluntarioren laguntzarekin, eta larunbatean ezusteko polita hartu zuten. Iruñeatik bi ibilgailu iritsi ziren, furgoneta bat, eta auto handi bat, kaxaz beteta. Zarautzen egoitza duen Salvamento Maritimo Humanitario (SMH) gobernuz kanpoko erakundeko Iruñeko kide baten ekimena izan zen. Urte hasieran Chiosen egondakoa da bera, eta Hondarribian bilketa egiten ari zirela jakiterakoan, inguruko jendea mugiarazi zuen. San Juan de Dios ospitalean areto bat utzi zieten eta bertan sailkatu zuten arropa. Hala, larunbat eguerdian Puntaleko egoitzara eraman zuten bildutakoa, 60 bat kaxa handi, dena behar bezala sailkatua. Emekiko arduradunen laguntzarekin Lezora eraman zuten guztia, bidaia egingo duen Echemar garraio enpresara. Hasiera batean bilketa atzo bukatzekoa bazen ere, aste honetan ere jasoko dituzte arropak Puntaleko eskola zaharrean, 11:00etatik 13:00etara eta 18:00etatik 20:00etara. Eta diru ekarpena egin nahi duenak —besteak bete, barruko arropak erosteko—, Kutxabanken ireki duten SOSErrefuxiatuak kontuan egin dezake: ES 9120 95 5039 90 9115926855. Kanpaina Twiterren jarraitzeko: