Elkartasun tsunamia eragin du Emekik

Chios irlako errefuxiatuentzako bilketa kanpainak arrakasta handia lortu du. Apirilaren 3ra arte jasoko dute arropa.

Asier Perez-Karkamo

2016/03/29

Emekiko kideak eta boluntarioak orain arte bildutako arropa sailkatzen

Harrituta dago Hondarribiko Emeki elkartea Siriatik Greziara joandako errefuxiatuentzako arropa biltzeko kanpainak izan duen arrakastarekin. Herriko hainbat eragilerekin ideia konpartitu eta gero, ostegunean abiatu zuten kanpaina eta ordutik etenik gabe joan zaizkie Puntaleko egoitzara arropak eramatera. “Iruñeatik ere etorri dira”, komentatu dute gaur goizean. Emekiko kideez gain, elkartekoak ez diren herritarrak ari dira sailkapena egiten. Boluntarioak ez ezik, garraioa ere lortu du Emekik. Lezoko Echemar garraio enpresa prest azaldu da bildutako arropa guztia Greziara eramateko, debalde. Apirilaren 3ra arte eraman daiteke arropa, goizez 11:00etatik 13:00etara, eta arratsaldez 18:00etatik 20:00etara. Batez ere neguko arropa da behar dena, baina konpresak eta pardelak ere hasi dira biltzen, zapatak, txandalak… “eta udako arropa ere, hemendik gutxira beharko dute”. Barruko arropak ere behar dituzte Chios irlara iristen ari diren errefuxiatuak, baina horiek erosi egingo ditu Emekik. Horretarako SOS Errefuxiatuak izeneko kontu korronte zenbakia ireki dute Kutxabanken: ES 9120 95 5039 90 9115926855. Herritarrek nahi duten ekarpena egin dezakete bertan. Gaur bilera irekia egingo dute egoitzan, kanpainaren nondik norakoez eta azken berrietaz hitz egiteko.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.