Muara erasotu izana salatu du Sortuk
Kalteak eragin dituzte elkarteko sarreran eta euskal presoen hurbilketaren aldeko ikurra lapurtu dute.
Joan den asteburuan Muara elkartearen kontrako eraso bat izan zela eta jakinarazi du Hondarribiko Sortuk, eta presoen ikurra lapurtu izana gogor gaitzetsi dute: “Muara kultur elkarteko sarreran egindako txikizioak salatu nahi ditugu, baina bereziki euskal presoen hurbilketa aldarrikatzen duen ikurraren lapurreta”. Ez da lehen aldia Muaran jarrita izaten den euskal presoen ikurra lapurtu edo kaltetzen dutena, eta Sortuk kritikatu du “euskal gizartearen gehiengo oso zabal batek bat egiten duen aldarrikapen honen ezaugarriarekin hain anker jokatzea”.
Nolanahi ere, presoen eskubideak aldarrikatzen jarraitzeko asmoa azaldu du Sortuk: “Euskal presoen eskubideen aldeko aldarria kentzen dutenei esan nahi diegu horrelako ekintzek ez gaituztela Euskal Herriaren normalizazio politikoaren eta bereziki euskal presoen eskubideen aldeko lanetik desbideratuko”.
