3.600 bisitari izan ditu Hondarribiko Basque Market artisautza eta diseinu azokaren lehen ekitaldiak.
3.600 bisitarirekin, arrakastatsua izan zen joan den asteburuan Itsas Etxean egin zen
Hondarribiko Basque Market artisautza eta diseinu azokako lehen ekitaldia. Maria Serrano Hondarribiko Udaleko Merkataritza eta Turismo zinegotziak onartu du aurreikusitako zenbakiak gainditu direla, eta pozik azaldu da hori lortu izanagatik: “Oso pozik egoteko modukoa da publikoak emandako erantzunagatik; hasieran helburu bezala jarri genituen zifrak gainditu egin ditugu. Lehen aldiz zen Hondarribian antzeko ekimen bat antolatzen genuela eta bisitari kopurua, bisitari hauen komentarioak eta erakusleen balorazioak kontutan izanda, pozik egoteko moduan gaude, denontzat esperientzia positiboa izan baita”.
Igande goizean elkartu zen jende gehiena
Maila handiko hamazazpi erakusketari bildu zituen lehen Basque Marketek, horietako batzuk herrikoak, eta hainbat ekitaldi paralelorekin osatu zuten egitaraua: hitzaldiak, zuzeneko musika, haurrentzako tailerrak, eta abar. Raquel Hernandez Boned azokaren koordinatzailearen ustez, horrek publikoa erakartzea lortu zuen: “Asteburu osoan zehar giroa oso ona izan da, erakustokietara ikusle asko hurbildu dira eta une berean antolatutako ekimenetara ere gauza bera esan daiteke: haurrentzat hamar tailer egin dira, lau hitzaldi eta beste hainbat kontzertu egon dira Itsas Etxea Auditoriumean”.
Akaso, gastronomia eskaintza izan da Hondarribiko Basque Market azokaren lehen ekitaldiak izan duen hutsune bakarretakoa, azokan ez baitzen egon ezer jateko edo edateko aukerarik.