Martxoaren 8aren harira, alarde tradizionalek eta hainbat emakume taldek adierazpena adostu dute
Irungo eta Hondarribiko alarde tradizionaletako kideek, nahiz hainbat emakume taldek, Martxoaren 8aren harira adierazpena egin dute.
Irungo eta Hondarribiko alarde ez parekideetako kideek, nahiz hainbat emakume taldek, Martxoaren 8aren harira adierazpena egin dute. Hona, hitzez hitz, adierazpen hori:
“Irungo San Martzial Alardeko Buruzagien Batzordeak eta Alarde Fundazioak, Irun eta Hondarribiko alardeen antolatzaile diren heinean, Emakume Irundarrak, GordeZAN, Pagoki eta Hondarribiko Emakumeak emakume elkarteekin batera, Nazio Batuek Emakumeen Nazioarteko Eguna izendatutako martxoaren 8aren harira, emakume eta gizonen berdintasunaren alorrean gure zalantzarik gabeko defentsa jakinarazi nahi dugu, hala nola emakumeen aurka gauzatzen den edonolako indarkeriaren inguruan gure gaitzespenik gogorrena plazaratu ere.
Nolanahi ere, San Martzialeko Alardea eta Hondarribiko Alardea indarkeria matxistarekin lotzea bilatzen duen salaketa oro amaitzea exijitzen dugu. Auzitegi Goreneko bi sententziak azpimarratzen duten bezala bi desfileak guztiz legalak dira, eta ez dute inongo genero-diskriminazio ezta desberdintasun kutsurik ere. Bestelakoa adieraztea gezurra esatea da, eta alardeak indarkeria matxistarekin parekatzea gizarte gaitz hau jasaten duten emakumeei irain egitea da.
Genero desberdintasuna pairatzen dutenen ondoan egongo gara beti eta emakume eta gizonen artean lan baldintza, soldata nahiz amatasun/aitatasun baimena berdintzea suposatzen duten ekintza guztiak babestuko ditugu.
Irun eta Hondarribiko alardeak bi herrietako gehiengoak nahi eta babesten duten bezala egiteko lanean jarraituko dugu, baita bi herrietako emakumeen gehiengoak nahi eta babesten duten bezala”.
Adierazpenaren sinatzaileak: Irungo San Martzial Alardeko Buruzagien Batzordea, Alarde Fundazioa, Emakume Irundarrak, GordeZAN-Anakako Emakumeak Kultur Elkartea, Pagoki Emakume Elkartea, Hondarribiko Emakumeak.
