Ardo berria dastatuko dute hilaren 12an Hiruztan
Laugarren urteurrena ospatzeko bertso-bazkaria antolatu dute Sebastian Lizaso eta Amets Arzallusekin.
Hondarribiko Hiruzta upategiak urtebetetzea ospatuko du hilaren 12an, larunbatez. Lau urte beteko ditu Jaitzubia auzoko txakolindegiak eta festa giroko bertso-bazkari batekin ospatuko dute, eta uzta berriko txakolina aurkezteko aprobetxatu.
Bazkarirako izena ematen dutenek 13:00etan dute zita. “Upategira jaitsi, txotx egin, eta Hiruzta 2015 txakolina dastatuko dute parte hartzaile guztiek”, adierazi dute upategikoek: “Dastaketa, aperitiboa eta bertsoak edukiko ditugu bertan”. Horretarako, Sebastian Lizaso eta Amets Arzallus bertsolariak gonbidatu dituzte.
Aperitiboan ez ezik, bazkarian ere izango dira Lizaso eta Arzallus, eta beste lagun bat izango dute ondoan, Mikel Salabarri musikari eta abeslaria. Hirurak bazkaria alaitzen saiatuko dira, eta seguru lortuko dutela.
Hiruzta upategiaren laugarren urtebetetzeko bertso-bazkarira joan nahi duenak 943 10 40 60 telefonora deitu behar du, edo upategiko helbide elektronikora mezu bat bidali.
Hiruzta txakolindegia, Hondarribiko Jaitzubia auzoan
