Mikel Sarriegik etxean estreinatuko du euskaraz 'E, petrel!'

Sarriegi bera eta Alvaro Garaialde dira aktoreak, eta Iñaki Dieguezek akordeoia zuzenean joko du. Abentura eta ametsak uztartzen ditu obrak.

Asier Perez-Karkamo

Hondarribia

2016/02/23

Sarriegi, Dieguez eta Garaialde, ‘E, petrel! Julio Villarrekin solasean’ obrako entsegu batean

Julio Villar nabigatzaile donostiarraren E, petrel! Cuaderno de un navegante solitario liburuan oinarritutako E, petrel! Julio Villarrekin solasean obra antzeztuko dute ostiralean Hondarribiko Itsas Etxea Auditoriumean. Mikel Sarriegi hondarribiarrak sortutako Astrolabium Teatroa taldearen lana da, Sarriegik berak moldatua. Iazko urrian gaztelaniaz estreinatu zuten Pasai San Pedroko Albaola Itsas Kultur Faktorian (ikusi beheko bideoa), eta ostiral honetan lehenbizikoz euskaraz antzeztuko dute, zuzendariaren etxean. Sarriegi bera izango da Julio Villar taula gainean, eta bere ondoan ariko dira Alvaro Garaialde, haren lagunaren papera betez, eta Iñaki Dieguez soinujolea. Musikari irundarrak obrarentzako propio sortu du musika, eta taula gainean joko du, zuzenean. Julio Villarrek Mistral belaontzian egindako lau urteko bidaia gogoangarria kontatzen du obrak. 1968an Bartzelonatik abiatu eta, 38.000 itsas milia egin ostean, Lekeitiora iritsi zen 1972an, munduaren bira eginda. Arriskuz, gorabeheraz eta zirraraz betetako bidaia bat izan zen, Villarrek liburuan kontatzen duenez, “askatasun sentimenduaren bultzadaz egina”. Astrolabium Teatroak garai hartako eta egungo protagonistaren ikuspegitik kontatzen du bidai hura. “Lagun baten eta musikari baten eskutik, Julio Villar abentura hartara bultzatu zuten arrazoien berri izango dugu, haren nortasunean barneratuko gara, eta bidaia gogoangarri hartako zenbait pasadizo biziko ditugu. Gaur egungo Julioren nondik norakoak ere agertuko dira, orain egiten duen bizimodua eta haren bidaiak”, azaldu du Astrolabiumek. Kontakizunaren bitartez, Villar abenturazalea ezagutzeko aukera izango du ikusleak, baita bere alderdi ameslari eta poesia zalea. “Naturak eta Lurrak liluratuta bizi den pertsona ulertzen saiatuko gara, bai eta haizeak, izarrek eta ilargiak harengan sortzen dituzten sentimenduak ere”, erantsi dute. Ostiralean izango da obraren euskarazko moldaketaren estreinaldia Itsas Etxean, 20:00etan. Dagoeneko sarrerak salgai jarri dituzte Arma Plaza kultur eta turismo gunean (osteguna arte), eta Interneten erosi nahi duenak, Kutxabanken bitartez egin dezake.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.

Mikel Sarriegik etxean estreinatuko du euskaraz 'E, petrel!'

Gipuzkoa

Hernani eta Irun lotzen dituen Renfeko tren zerbitzua etengo dute uztailaren 25etik irailaren 6ra

Bergarako eta Zarauzko autoen ikuskapen zentroetan greba mugagabeari eutsiko diote

Beasaingo Urkiola jatetxeak irabazi du Jakitea elkartearen Juan Manuel Garmendia gastronomia saria

Torreko Hodia ikusgai jarriko dute Ekainberrin, duela 12.000 urte grabatutako pieza bat

Deeptek-Gipuzkoa fundazioak programa bat abiarazi du enpresa zientifikoei laguntzeko

Ertzaintzak Donostiako Karmengo jaietan «herritarren aurka erabilitako indarkeria» salatu du EH Bilduk

Donostiako Karmengo jaietan jasandako «jazarpen poliziala» salatu du besta batzordeak

Abuztuaren 11tik 14ra jokatuko dute Donostia Hiria torneoa

Burujabetza eske elkartu dira 180 alkate inguru Bergaran

Ahotsak eta omenaldiak ardatz Donostiako Jazzaldian