82.218 bisitari zenbatu zituzten iaz Hondarribiko Arma Plazako turismo bulegoan, aurreko urtean baino ia 22.000 gehiago.
82.218 bisitarirekin, turistek Hondarribiko Arma Plazako turismo bulegoko marka hautsi dute 2015ean. Hazkundea ez da berehalakoa izan, urtetik urtera gertatutakoa baizik, baina azken urteko igoera oso handia da, handiagoa kontuan hartzen bada 2014ko datuak ere oso onak izan zirela. Urte hartan 60.321 bisitari jaso zituzten Arma Plazan, asko, baina hurrengo urtean kopuru hori %36 igo egin da.
Berriro uztaila eta abuztua dira bisitari gehien biltzen dituzten hilabeteak, baina urte osoan bisitari talde asko izan dira, eta daturik eman beharrik gabe, nabaria izan da denboraldi baxuan ere turisten presentzia Alde Zaharrean, duela urte gutxi pentsaezinezkoa zena. Hondarribiko Udalak nabarmendu du “urrian bisitarien kopurua %73 igo” zela 2014 urtearekiko.
Udatik kanpora nabaritu da bereziki bisitarien hazkundea
Gainera, Hirigune Historikoan egindako bisita gidatuen kopurua bikoiztu baino gehiago egin da (2.831 bisitatik 5.665era). Aldiz, gotorlekura jende gutxiago joan da —1.754 pertsona 2014an, 1.516 iaz—; kontuan hartu behar da gotorlekua bisitatzeko aukera dagoenetik asko direla bertara joan diren hondarribiarrak, eta ziurrenik eragin handiagoa izan zuen horrek duela bi urteko datuetan.
Lurraldeko “abangoardian”
Arma Plazako turismo bulegoan jaso dituzten datuei erreparatuz, “bikainak” direla uste du Maria Serrano Turismo zinegotziak: “Hondarribiko datu turistikoak bikainak izan dira. Euskadi eta Gipuzkoako datuak kontuan hartuta, Gipuzkoako turismoaren abangoardian gaude”. Turista kopuruagatik ez ezik, bisitariak urte osoan iristeagatik ere azaldu da pozik Serrano: “Lortu dugu lehen hilabete sendoak uztaila eta abuztuak baziren orain martxoa erdi aldetik azaroa bitarteko epea izatea sendoa. Zazpi-zortzi hilabete, turistak joan-etorrian. Aurten abendua ere oso datu onak ematen ari da, abenduko zubiko eguraldi onari eta Gabonei esker”.
Bere iritziz, bisitarien ohiturei moldatzea ezinbestekoa izan da, esaterako Arma Plazako bulegoa astelehenetan eta eguerditan irekiz, eta saiakerak saria eman du: “Europan guk baino lehenago bazkaltzen dute, eta hori dela-eta, eguerdietan zabalik izanda zerbitzu ona eskaintzen diegu europar turistei. Eta hori datuetan antzematen da”.
Turismo bulegoek egiten duten lanaz gain, bisitariek hoteletan jasotzen duten informazioa beharrezkoa dela uste du zinegotziak, eta hotelen lana goraipatu du: “hala kalitatea eskaintzen zaie turistei”.