Espainiako Ligan hasi da Lidia Yarza
Valentziako Judokan taldearekin hasi da maila absolutuan lehiatzen eta estreinako jardunaldian bi borroka irabazi ditu, eta bat galdu.
Lidia Yarza Ama Guadalupekoa taldeko judoka kluben arteko emakumeen Espainiako Ligan lehiatuko da aurten Valentziako Judokan taldearekin. Gazte Mailako egungo Espainiako txapelduna da Yarza eta bere kirol formazioan urratsak ematen jarraitzeko hasi da liga absolutuan. Talde indartsua da Judokan, iaz hirugarren geratu baitzen kluben ligan.
Asteburuan jokatu zen lehen jardunaldia eta oso lan txukuna egin zuen hondarribiarrak, bi borroka ippon bidez irabazita eta borroka bakarra galduta, senior mailako judoka baten kontra.
Gipuzkoako Txapelketa
Asteburuan ere Gazte Mailako Gipuzkoako Txapelketa jokatu zuten Hernaniko kiroldegian eta Ama Guadalupekoa taldeak bost kirolari aurkeztu zituen: Iker Otegi (-66 kilo), Joaquin Lopez, Joel Herrador (-81), Aritz Garcia (-73) eta Eneko Aragon (-66). Otegik bigarren postua lortu zuen eta Herrador eta Lopez hirugarren geratu ziren. Hirurek hurrengo asteburuan Gasteizen egingo den Euskadiko Txapelketan lehiatzeko txartela irabazi zuten horrela.
Lidia Yarza (+78), Maialen Ramos (-63) eta Oier Goikoetxea (-60) ez ziren Hernanin lehiatu, orain arteko emaitzak direla-eta dagoeneko sailkatuta baitaude Espainiako Txapelketarako. Madrilen egingo dute aurten, martxoaren 8an.
Lidia Yarza Judokaneko taldekideekin
