Gandhiren heriotza gogoratu dute hainbat ekitaldirekin. DBHkoak San Gabriel egoitzara joan dira bertakoekin bakearen inguruko lanak egitera.
Urtarrilaren 28an egin zuten ekitaldi nagusia
1948ko urtarrilaren 30ean Mahatma Gandhi hil zutela gogoratzeko Bakearen Astea ospatu dute Hondarribiko San Jose Ikastetxean. Urtero lelo bat lantzen dute eskolan, eta aurtengoa honakoa da:
Keinu txikiek mundua aldatzen dute. Lelo hori bera erabili dute Bakearen Astean. “Egunero egiten ditugun keinu txikiak oso garrantzitsuak eta baliagarriak dira mundua aldatzeko, gure egunerokotasuneko keinu txikietatik abiatuz, lorpen handiak eskura baititzakegu”. Horregatik, “hainbat arrazoirengatik gaizki pasatzen ari diren guztiak” izan dituzte gogoan Bakearen Astean.
Horri lotuta, eskulanak, idazlanak, eta abar prestatu dituzte, “eta astearen hondarrean 3.DBHko ikasleak San Gabriel Egoitzara joan zaizkigu, bertako aitona-amonekin bakearen inguruko lan batzuk egin eta elkarrekin egotera”. Gaineratu dutenez, hilero joaten dira egoitzara, “eta asko eskertzen digute bertakoek”.
Bakearen Asteko ekitaldi nagusia urtarrilaren 28an egin zuten, familia giroan. “Ekitaldian eskolako hezkuntza komunitatea osatzen dugunon artean uso zuri baten puzzlea osatu dugu, bakearekin zerikusia duten esaldiak irakurri ditugularik”. Primerako ekitaldia izan zela ziurtatu du Hondarribiko San Jose Ikastetxeak.
DBHko ikasleak San Gabriel egoitzan, egoiliarrekin lanak prestatzen