Irunbus zerbitzuaren linearekin erabiliena Zaisa-Ospitalea (L1) izan da, baina gorakada handiena izan duena Gautxori zerbitzua.
12 autobusek ematen dute Irunbusen zerbitzua
Iaz, 1.590.428 bidaiarik erabili zituzten Irungo autobus publikoak, Irunbus. 2014an aurreko urteetako marka hautsi bazen, iazko datuak are hobeak izan dira, aurreko urtearekin alderatuz %3,34ko igoerarekin (51.450 bidaiari gehiago). 2002tik, Irungo garraio publikoaren datuak zenbatzen direnetik, zifrarik altuena izan da 2015ekoa. Udala, hortaz, pozik dago datuokin, eta esan du 2012an lineen bideak aldatu egin zirenean erabiltzaileen garraio publiko beharrari “egoki” erantzuten ari zaiela.
Honakoak dira lineek izan dituzten bidaiarien datu zehatzak 2015ean:
- Zaisa-Ospitalea linea (L1): 1.162.362 erabiltzaile, 2014an baino %1,7 gehiago (19.816 bidai).
- Erdialdea-Katea linea (L2): 344.155 erabiltzaile, 2014an baino %8,4 gehiago (26.729 bidai).
- Artia-Erdialdea-Olaberria linea (L3): 79.773 erabiltzaile, 2014an baino %5,7 gehiago (4.353 bidai).
- Gautxori linea: 4.113 erabiltzaile, 2014an baino %15,5 gehiago.
- Landa eremurako zerbitzua: 4.109 erabiltzaile, 2014ko 3.842en aldean.
Gainera, hirian izandako autobus aldaketen edo transbordoen berri eman du udalak. Horrela, bidai oso bat egiteko ibilgailu ezberdinak erabili zituztenak 67.032 izan ziren iaz. 2012an, horien kopurua 16.492koa izan zen. Udalaren arabera, horren arrazoia da Mugi txartelaren erabilera indartzen ari dela hirian; hirian garraio publikoa erabili zutenen %79k erabili zuen txartel hori ordainketa egiteko.
12 autobus
Irunbusek 12 autobus ditu, horietatik zortzi 12 metrokoak (ohiko autobusak), bi hamar metrokoak, eta beste bi mikrobus. Egoitza Belaskoenea auzoan du konpainiak, 1.600 metro koadroko pabilioi batean, 1.000 metro koadroko garbiketa eta mantenu eremua duena kanpoaldean. Bulegoak ere badaude bertan. Eremu hori
Auif enpresak (Irungo autobus publiko nahiz bestelako zerbitzuak ematen ditu) kudeatzen du.
