2.000 erabiltzailek dute sakelakoan TAO-aren aplikazioa

Iaz 45.764 operazio egin ziren aplikazioa baliatuz TAO eremuko aparkalekuak ordaintzeko

2016/01/19

TAO makina bat, San Migel auzoan

Iazko azken egunean jasotako datuen arabera, ia 2.000 pertsonak dute deskargatuta euren sakelako telefonoetan TAO zerbitzua erabiltzeko aplikazioa (app). Horiek, iaz, 45.764 tiket atera zituzten zonalde urdinean autoa aparkatzeko, operazio guztien %7. Hortaz, TAO txartela ateratzeko jarduera gehienak txanpon bidez egiten badira ere, goraka doa sakelakotik eta beraz kreditu txartel bidez ordainketa egiteko ohitura. 2015eko maiatzean jarri zuen udalak indarrean app hori. Iazko azaro eta abenduan erabili zen gehien app zerbitzua, 2015ko erabilera guztien erdia bildu zen bi hilabete horietan. Udalak esan duenez, aurrerantzean app bidezko ordainketa sustatzen jarraituko dute, eta Cristina Laborda Mugikortasun ordezkariak adierazi duenez, aplikazioa gehiago ezagutarazteko bideari ekingo diote. Android, iOS, Windows Phone eta BlacBerry sistema eragilea duten gailuetara jaitsi daiteke TAOren aplikazioa. ‘Desaparkatu’ TAOren aplikazioak ematen dituen beste abantailetako bat da desaparkatzeko aukerarena. Hau da, telefono bidezko ordainketa egiten denean adierazi behar da zenbat denboraz egon behar duen autoak TAO eremuan, baina erabiltzaileek denbora tarte hori baino laburrago egon behar badute, erabili ez diren minutuen zenbatekoa berreskuratzeko aukera dago. Beste zerbitzuen artean app-ak ahalbidetzen du TAO txartela ez atera behar izatea, aplikazioak oharra bidaltzen du aparkatzeko denbora amaitzear denean, eta hori gertatuz gero, denbora tartea handitzeko aukera ematen du.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.