Si Se Puede Irunen arabera, udalak 6,8 milioi pasatxo bideratuko ditu inbertsioetara, eta horretatik, 442.160 euro baino ez ditu gizarte ongizatera, kulturara eta aisiara bideratuko.
Carlos Reglado eta David Soto SPI Si Se Puede Iruneko hautetsiak.
Hilaren 29an egingo dute aurrekontuei buruzko osoko bilkura, eta egunotan alderdiak aurkeztuko dituzten zuzenketak aurkezten ari dira. Gaur, SPI Si Se Puede Irunek 22 zuzenketa aurkeztuko dituela jakinarazi du.
Agerraldia egin dute gaur goizean David Soto eta Carlos Regladok, eta udalak egindako proposamena (oraindik ez da behin betikoa) iazko aurrekontuen jarraipena dela kritikatu dute. Si Se Puede Irunen arabera, udalak 6,8 milioi pasatxo bideratuko ditu inbertsioetara, gehienak hirigintzara, eta horretatik, 442.160 euro baino ez ditu gizarte ongizatera, kulturara eta aisiara bideratuko. “Herritarrentzat oso garrantzitsuak diren gaietan %6,4 baino ez du inbertituko udalak”, salatu du Sotok.
Udal taldeak aurkeztutako proposamenetako batzuk jakitera eman ditu SPIko bozeramaileak: kutsadurari buruzko ikerketa eta prebentzioa sustatzea, gizarte larrialdietarako laguntzak handitzea, hezkuntza eta gazteria teknikari bana kontratatzea, auzoen parte hartzea handitzeko auzo mahai bat osatzea eta Foru kaleko hotela jarri behar zuten tokia urbanizatzea. 22 emendakinetan herritarrek aurkeztutako proposamenak daudela aurreratu du Sotok.
Osoko bilkuran egongo da SPI
SPIk, EH Bildurekin batera, osoko bilkuretara ez aurkezteko asmoa agertu zuen, udalak espedienteak ikusteko eragozpenak jarri dizkielako. Sotoren arabera, udalak urtarriletik aurrera emango die sarbidea espedienteak kontsultatzeko. Hori kontuan hartuta, “guk plenora joateko ardura gure egiten dugu”, aurreratu du Sotok.