Margarita Alkain izango da banderen bedeinkapena ekitaldiko ama pontekoa.
Arraunlariei egindako harrera bat, uztailean
Urtean zehar irabazitako banderen bedeinkapena egingo du bihar Hondarribia Arraun Elkarteak. 12:15ean abiatuko dira egoitzatik, aurretik Abiyuan txaranga nekaezina izango dutelarik. Ohi bezala, arraunlariek, zuzendaritzako kideek eta Arrantzaleen Kofradiako ordezkariek osatuko dute taldea, eta udaletxe parean, udal ordezkariak batuko zaizkie. Hortik parrokiara joango dira denak, bertan banderen bedeinkapena egiteko.
Orotara, 31 bandera paseatuko dituzte bihar herritik, aulki mugikorreko bat, elkarteko trainerillak lortutako lau, bederatzi bigarren ontziak irabazitakoak, eta hamazazpi Ama Guadalupekoa ontziak herrira ekarritakoak, horietako hamabi San Miguel ligan eskuratu dituenak.
Horiek guztiak bedeinkatuko dituzte bihar parrokian. Dudarik gabe, egun berezia izango da arraun elkarteko kide eta herriko arraun zale guztientzat, eta oso hunkigarria ekitaldiko ama ponteko izango den Margarita Alkainentzat. Elkarteko zuzendaritzako kide Iñaki Oiarzabal zenaren emaztea eta Borja Oiarzabal arraunlariaren ama da.
Mezaren ondoren Hermandadera hurbilduko dira eta bertan utziko dituzte trapuak, kofradiaren esku. Eguna biribiltzeko, Alamedan bazkalduko dute arraun elkarteko kideek eta haien gertukoek.
Denboraldi “hobezina”
Bandera asko irabazi arren, gutxitan izaten dute herriko arraunlariek garaipenak ospatzeko aukera. Banderen bedeinkapena egiten duten eguna izaten da horietako bat, eta aurten ere merezita ospatuko dute, denboraldi historikoa burutu baitu Hondarribia Arraun Elkarteak.
Arraun elkartearen hitzetan, “denboraldi hobezina” izan da 2015ekoa. Lehen traineruak hirugarrenez irabazi du San Miguel Liga, txapelketako puntuen marka hautsiz gainera. Eta bigarren ontzia KAE2ko txapeldun geratu da.
Hondarribia Arraun Elkarteak 2015ean lorturiko banderak
- Gipuzkoako Aulki Mugikorreko XIV Liga. (Jubenil maila)
- V. Antxoa Eguna. (Trainerillak. Getaria)
- XXXII. San Telmo Saria. (Trainerillak. Zumaia)
- 50. Urteurrena Bandera. (Trainerillak. Pasai Donibane)
- Gipuzkoako Trainerila Txapelketa. (Trainerillak. Senior Maila)
- Pasai San Pedroko VII. Erlojuz kontrakoa. (Traineruak)
- Leketioko XXXVII. Ikurriña. (Traineruak)
- Pasaiko XXXI. Ikurriña. (Traineruak)
- Mutrikuko XVI. Ikurriña. (Traineruak)
- Sestaoko I. Iberia Bandera (KAE2)
- Plentziako Hiria XXVII. Estropada (KAE2)
- XII. Algortako Portuzaharra Ikurriña (KAE2)
- I. Oiartzungo Ikurriña – Pasaia (KAE2)
- Bermeo Arraun Elkartea II. Bandera (KAE2)
- XLIII Bandera Ciudad de Castro Urdiales IX Memorial (KAE2)
- XXII Bandera del Asón (KAE2)
- IX. Hondarribiko Arrantzaleen Kofradiako Bandera – Hondarribiko XX. Promozio Estropada (KAE2)
- KAE2 Ligako Txapeldunak (KAE2)
- Gipuzkoako Traineru Txapelketa (Trainerua Senior Maila)
- III. Bandera Euskadi Basque Country (TKE)
- III. Bandera Nauta Sanxenxo (TKE)
- III. La Caixa Bandera (TKE)
- XXV. Orioko Estropadak (TKE)
- VII. Ambilamp Bandera (TKE)
- Getxoko Estropaden XXXVII. Ikurriña (TKE)
- XXV. Bandeira Concello de Boiro (TKE)
- Zarauzko XXXVIII. Estropadak (TKE)
- Hondarribiko XXVIII. Bandera – GP Mapfre (TKE)
- Portugalete Hiriko XXXIV. Bandera (TKE)
- Bilboko VI. Bandera (TKE)
- Bermeo Hiriko XXXIII. Bandera (TKE)
