Autobusa 02:30ean aterako da Biseratik Madrilera bidean. Aurten Euskal Herrian sei izan dira emakumeen kontrako indarkeriak hil dituen andrak.
indarkeria matxista martxa
Gipuzkoa mailako plataforma osatu dute Madrilen larunbat honetan, hilak 7, indarkeria matxistaren kontra egingo den martxara joateko. Irungo Gaurko Andreak, Pasaiako Bekoz Beko, Donostiako Haurralde, Zumaiako Malen Etxea eta Astigarragako Harituz eta EBEL emakume baserritarren elkartea dira elkarte horiek.
Irundik autobusa betetzea lortu dute, eta egunean bertan, 02:30ean aterako da Biseratik. Edonola ere, norbaitek joan nahi izango balu, 679 33 24 11 (Izaskun) telefono zenbakira dei dezake.
Irungo Udalak bat egingo du manifestazioarekin, bozeramaileen batzarrak mozio bat onartu ondoren. Sergio Corchonek esan du udala “emakume nahiz gizonen arteko berdintasunaren alde eta edozein indarkeria motaren kontra” dagoela. Antolatzaileek jakinarazi dutenez, Irungo Udalaz gain, bat egin dute manifestazioarekin Donostia, Pasaia eta Astigarragako udalek ere. Oraindik edozein atxikitu daitekeela aurreratu dute.
Gaurko Andreak-eko Irene Kastezubik gogorarazi duenez, aurten sei emakume hil dituzte Euskal Herrian emakumeen kontrako indarkeriarekin lotuta, eta Espainiako Estatuan, berriz, 74 izan dira. “Emakume izateagatik bakarrik”, 20 urtetan, 1.380 emakume hil dituzte. “Indarkeria matxistak genero desberdintasunaren adierazpenik larrienak dira eta emakumeen eskubideen urraketa gogorrak dira”, gaineratu du Kastezubik. Horregatik, hilketa bat bera ere ezin dela onartu esan du.
Martxa horren bidez, “terrorismo matxistaren kontrako borroka estatu-auzia” izateko eskatuko dute, eta klase politiko guztia borroka horretan konprometitzea gizartea osoarekin batera: “Emakumeek bakarrik ezin dugu borroka hori aurrera eraman, gizonek ere inplikatu behar dute”, esan du Patricia Ponce Haurralde fundazioko kideak. Horrez gain, Istanbuleko Hitzarmena garatu eta ezartzea, eta NBEren gomendioak ere betetzea eskatuko dute martxa horretan. Gainera, emakumeen kontrako indarkeria prebenitzeko neurriak hartzeko eskatuko dute, eta hori txiki-txikitatik hastea hezkuntzari garrantzia berezia emanez. Azkenik, udalak talde feministekin lan egitera animatu ditu, hiriak indarkeriarik gabeko toki bihurtzeko.
“Emakume bat biktima denean, denak gara modu batean”
Agerraldian, Asun Casasola 2008an hil zuten Nagore Laffageren amak egindako adierazpena irakurri dute. Casasolaren iritziz, gizarteak ezin du geldirik egon XXI. mendeko izurrite horren aurrean. Bere alaba nahiz orain arte hil dituzten emakume guztien alde borroka egiteak pena merezi duela esan du, “emakume bat biktima denean, modu batera edo bestera, denok garelako horren biktima ere”.
Aurrerapenak izan direla onartu du, baina gizarteak posizionamendu argi bat erakutsi behar duela. “Emakumeen kontrako indarkeria irudikatu dezakeguna baino gertuago ematen da, eta horregatik borrokan jarraitu behar dugu”.
