Ekonomia sozial eraldatzailearen azoka antolatu dute larunbat honetarako, hilak 31, Lakaxita gaztetxean, 17:00etatik 20:00etara.
LKXT koopen aurkezpena
Ekonomia sozial eraldatzailearen azoka antolatu dute larunbat honetarako, hilak 31, Lakaxita gaztetxean. Azoka horren atzean daude Lakaxita bera, Hiritik At eta Olatukoop elkarteak. Azoka 17:00etatik 20:00etara egongo da zabalik.
Egungo eredutik kanpo, kooperatiba gisa, modu etiko eta ekologikoan edota, oro har, modu alternatiboan lan egiten duten enpresak ezagutzeko aukera izango da. Fiare eta Koop57 banka zerbitzu etikoak eta aurrezki kooperatibak, Goiener energia hornitzaile kooperatiba, Basherri kooperatiba eta kontsumo taldeen sarea, Bidazi kontsumo ekologikora taldea eta Olatukoop ekonomia sozial eta eraldatzailearen sarea.
Enpresa horiek ezagutzeaz gain, Linuxa instalatzen edota garagardoa egiten ikasteko aukera izango dute Lakaxitara joaten direnek. Horrez gain, pintxo ekologikoak eta etxeko garagardoa eskainiko dituzte. Eguna bukatzeko, bi kontzertu izango dira: Sofa (rock instrumentala, Zarautz), eta Pelax eta Cowboys Orchestra (folk-rock Donostia).
Eredu alternatiboak egun posible direla esan dute antolatzaileek, “energia, finantza eta elikadura zerbitzuak orain arte bezala mantendu, eta era berean, modu etiko, parte hartzaile eta kooperatibo batean ekoiztuak izan direnenetatik lortzea”. Modu horretara, “ekoizpen garbi eta kooperatibo bat” bultzatu nahi ditu, eta era berean, “inguratzen gaituen sistema injustu eta txikitzaile honen aurrean, alternatiba sozioekonomiko berriak eraikitzen lagundu”.
Egitaraua
- 17:00: Linux instalazio tailerra.
- 19:00: Garagardoa egiteko tailerra.
- 20:00: Pintxo ekologikoen eta etxeko garagardoen dastaketa.
- 22:00: Kontzertuak (Sofa eta Pelax & Cowboy’s Orchestra.
LKXT koop
Lakaxitan ere eredu horrekin bat egin dute, eta ekonomia sozial eraldatzailea bultzatzeko espazio berria sortu dute. Horrekin lotuta, hainbat ikastaro ematen ari dira gaztetxean bertan. Gaur, esaterako, GIMP-INKSCAPE diseinu programa azalduko dute 09:30etik 13:30era arte. Hilabete honetan beste bi ikastaro egin dituzte.
