Estatutu aldaketa proposatuko dute Txinzerren, talde politiko guztiek ordezkaritza izan dezaten

Irunen eta Hondarribian ordezkaritza duten talde politiko guztiek Txinzerren tokia izan dezatela nahi dute Jose Antonio Santanok eta Txomin Sagarzazuk.

Urko Etxebeste

Hondarribia,Irun

2015/09/22

Atzoko batzarraren hasiera

Urtea bukatu baino lehen, Txingudiko Zerbitzuak erakundearen (Txinzer) estatutu aldaketa proposatuko dute Jose Antonio Santanok eta Txomin Sagarzazuk. Hurrenez hurren, eta atzo egindako ezohiko batzarraren arabera, Txinzerreko lehendakari izango da Irungo alkatea, eta lehendakariorde Hondarribikoa. Proposamen asmoak helburu bat du: egun bi udaletan ordezkaritza duten talde politiko guztiei toki egitea bertako administrazio kontseiluan. Proposamena lantzeko konpromisoa hartu zuten bi alkateek atzo, esanaz, beharrezkoa dela talde guztien presentzia Txinzerren erakunde publiko den heinean, baina baldintza batekin: “Orain arte izan dugun udalerrien orekari eta gobernagarritasunari eutsi behar diogu”. Atzoko batzarrean erabaki gehiago hartu zituzten. Administrazio kontseiluan izango diren kideak, Irundik, alkatearekin batera Miguel Angel Paez (PSE-EE), Xabier Iridoy (EAJ) eta David Soto (Si Se Puede Irun) izango dira; Hondarribiko ordezkariak Sagarzazu alkatea eta Jose Mari Altuna (EAJ) izango dira. Gipuzkoako Hondakinen Partzuergoan Txinzerrek izango dituen ordezkariak ere izendatu zituzten: Cristina Laborda (Irun, PSE-EE), Xabier Iridoy (Irun, EAJ) eta Juan Mari Altuna (Hondarribia, EAJ).

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.