Iaz baino 5.600 bisitari gehiago jaso dituzte uztaila eta abuztuan eskualdeko turismo bulegoek. Hotelen okupazioa ia %95ekoa izan da. Bidasoko Hitza.
Turistak, Hondarribiko Gipuzkoa plazan
Bidasoa Bizirik-ek emandako datuen arabera, turisten bisiten aldetik emankorrak izan dira uztaila eta abuztua: bi hilabete horietan 37.653 bisitari jaso dituzte Hondarribiko eta Irungo turismo bulegoek. Uztailean 14.653 bisita jaso zituzten, abuztuan 22.920. Iaz baino 5.603 bisitari gehiago izan dira epe horretan.
Horrek, hotelen okupazioan ere eragina izan du. Hala, bi hirietako hotelen okupazioa %94,72koa izan da uztaila eta abuztuan (iaz baino lau puntu gehiago), eta hotel batzuetan %100ean egon dira hainbat egunetan. Batez beste, bi gau pasatu dituzte Bidasoko hoteletan turistek.
Bittor Alza Hondarribiko Obispo hoteleko zuzendariak sumatu du bere establezimenduan bisitarien gorakada, “azken zortzi urteetan ez da horrenbeste jende etorri”. Aitortu du prezioak ez direla garai batekoak, eta gainera jendearen gastua ez dela orain dela urte batzuetakoa, baina pozik agertu du okupazio datuekin.
Datuak
- Turismo bulegoetan bisitariak uztaila eta abuztuan: Hondarribiko Arma Plazan eta kirol kaian 33.480; Irungo Luis Marianon 4.083. Orotara, 37.653.
- Jatorria: %68 Espainiako Estatutik iritsi dira; %17 Frantziako Estatutik. Gainontzekoak beste herrialdetakoak dira: Alemania, Japonia, Erresuma Batua, Belgika…
- Hotelak uztaila eta abuztuan: Hondarribiko hotelen okupazioa %95,22koa izan da, Irungoena %94,43koa. 2014an, epe horretan, %90ekoa izan zen batez bestekoa.
