Laugarrenez egingo dute Expogrow kalamuaren azoka Irungo Ficoban. Baina azoka baino askoz gehiago da.
Iazko Expogrow-ren irudia.
Ficoba erakustazokak urtean eskaintzen dituen ekitaldirik nagusienetakoa asteburu honetan da,
Expogrow. Ostiralean hasi, eta igandean bukatuko da cannabisa (
marihuana kalamuaren lore eta hosto ihartuen nahastea da) ardatz duen feria. Eta urtero bezala, oso zabala da: Ficoba barruan postuak egongo dira, cannabisaren gaineko hitzaldi eta mahai-inguruak egingo dira, kontzertuak ez dira faltako kanpoko karpan, eta cannabisaren gaineko lehiaketa ere egingo dute. Antolatzaileek esan dute “cannabisaren feria bat baino askoz gehiago” dela Expogrow.
Lau ardatz nagusi ditu Expogrow-k. Batetik, azoka bera. Ficobako 5.000 metro koadro hartuko dituzte bertan egongo diren erakusketariek, hamarnaka dira A, B eta C pabilioiak (Ficobako guztiak) beteko dituztenak. Bestalde,
Kalamuaren IV. Nazioarteko Foro Soziala da bigarren ardatza, gaiaren gainean jakintsuek hiru egunetan garatuko dutena, sektorearen egungo berri emateko, tendentzia berriekin. Hirugarren ardatza
kontzertuena da: egunero egongo dira Ficoba kanpoko zirku karpan (7.000 metro koadrokoa da) musika emanaldiak, talde ezagun eta esanguratsuekin. Azkenik, jarduera osagarriak daude, besteak beste herri kirolak eta cannabis kopa barruan dituela.
Zabala da oso Expogrow, anitza, jendetsua eta erakargarria. Bertan eta kanpoan da ezaguna. Aurten laugarren edizioa du. Jarraian, xehetasun gehiago.
Ordutegiak
- Ostirala 11: 10:00etatik 14:00etara, profesionalentzako zabalduko dute; 14:00etatik aurrera, denei zabalduko diete azoka 20:00ak arte. Kanpoaldean, kontzertuak 04:00ak arte.
- Larunbata 12: 11:00etatik 20:00etara zabalik. Ondoren, 04:00ak arte, kanpoaldean kontzertuak.
- Igandea 13: 11:00etatik 20:00etara zabalik.
Sarreren prezioak
- Egun bateko bonoa: 12 euro aldez aurretik, 15 Ficoban.
- Bi eguneko bonoa: 20 euro aldez aurretik, 23 Ficoban.
- Hiru eguneko bonoa: 25 euro aurretik, 28 Ficoban.
- Iganderako sarrera: 10 euro aurretik 13 Ficoban.
