Ez da diputazioko ordezkaritzarik izango Alarde egunean
Markel Olano ahaldun nagusiak adierazi du Jaizkibeli harrera egiteak "tentsio maila igotzen lagunduko" lukeela.
Azken urteetan baino babes txikiagoa izango du Hondarribiko Jaizkibel konpainia parekideak aurtengo Alardean, diputazioak ez baitu ordezkaririk bidaliko. Aurreko urteetan bezala, Emakundek eta Arartekoak emango diote babesa Jaizkibel konpainiari. Udal ordezkaritzari dagokionez, Abotsanitzek eta EH Bilduk adierazi dute konpainia parekideari harrera egingo diotela.
Gipuzkoako ahaldun nagusiak, Markel Olanok, argudiatu du kalterako litzatekeela Hondarribira joatea: “Gu han egoteak tentsio maila igotzen lagunduko luke”. Olano ez da izango Hondarribian, eta aldundiko beste kiderik ere ez, nahiz eta Berdintasunaren Hiria sariko banaketa ekitaldian Denis Itxaso sozialista presente izan zen. Aurreko lau urteetan, Bildu gobernuan zegoelarik, aldundiak babestu zuen Jaizkibel, Martin Garitano ahaldun nagusia bera buru zela. 
