Herriko emakume baserritarrak omenduko dituzte Gazte Egunean
Abuztuaren 29an egingo dute, Emakumeen Mundu Martxari lotuta. Gazte asanbladak jakinarazi du aurten ez dutela jaietako Bikingo Marea antolatuko, "indar faltagatik".
Abuztuaren 29an, larunbatarekin, egingo dute aurtengo Gazte Eguna. Hondarribiko Gazte Asanbladak (HGA) antolatuko du beti bezala, baina aurten Emeki emakume elkartearen laguntza izango du. Izan ere, Emakumeen Mundu Martxari lotuta egingo dute aurtengo ekitaldia, eta herriko emakume baserritarrak omendu nahi dituzte.
Martxoaren 8tik ari dira Emakumeen Mundu Martxa egiten. Europakoa, Kurdinstanen hasi zen eta urriaren 17an bukatuko da Coimbran (Portugal). Euskal Herria irailaren 28tik urriaren 4ra bitarte zeharkatuko du. «Gure asmoa da Nazioarteko ekintza honekin bat egitea eta ahal dugun neurrian gure bultzadatxoa ematea», azaldu du Larrun Sastre HGAko kideak.
Horregatik, aurtengo Gazte Eguna, martxa feministari lotuta egongo da. «Martxa honek elikadura burujabetzaren aldarria ere dakar. Hondarribian nekazaritza zein arrantza munduan emakume ugarik jarduten dutela ikusirik, hauen garrantzia ikustarazten saiatuko gara», erantsi du Sastrek. Emekik ere bat dator ideia horrekin: «Emakume nekazariek herriko bizitzaren onurarako egiten duten lana aintzatetsi eta goraipatu nahi dugu».
Hondarribiko emakume baserritarrak omenduko dituzte abuztuaren 29ko Gazte Egunean, eta ekitaldi sinpoliko bat burutuko dute Puntaleko eskola zaharrean, hain zuzen ere, gazte asanbladak eta Emekik egoitza duten eraikin ondoko lorategian: «Martxan, herriz herri aldarrien ereite sinbolikoak egiten ari dira, eta guk ere gure aldarriak landatzeko asmoa dugu sagarrondo bati lurra emanez».
Aurten ere, egun luzea izango da Hondarribiko Gazte Eguna. 10:30ean botako dute txupina Portuan eta ordu horretatik goizaldera arte ez da etenik izango. Emakumeen Mundu Martxari lotutako ekitaldiez gain, poteo lokaleroa eta gazte prozesiyu musikatua egingo dituzte goizez, eta hamabi probak ekitaldia, arratsaldez. Dena ongi, herri bazkaria Zumardian egingo da eta han izango dira gaueko kontzertuak ere.
