Berdeak eta urdinak, horien aurretik
Ligako lehen erdia bete denean, Bermeok eta Hondarribiak erakutsi dute une honetan besteen gainetik daudela. Ez alde handiarekin, baina Orioren aurretik daude biak. Gainontzeko ontziek ezustekoren bat eman dezakete banderei begira, baina momentuz behintzat, hiru oilar daude oilategian.
Mikel Orbañanos eta Aner Etxart, igandeko ongietorrian
Bermeo, itsasoan beldurgarri
Urdaibaik bi bandera astindu ditu San Miguel Ligako lehen erdian, bederatzitik bi. Oraindik aukerak baditu liga irabazteko, denbora agortzen ari zaion arren, eta Hondarribiak bezala, talde zabala du, denboraldi amaierara sasoiko iristeko arazorik izango ez duena. Hondarribiak lau bandera gehiago irabazi dituen arren, bizkaitarrak hortxe daude ia beti, lau aldiz geratu dira bigarren, eta Gorka Aranberrik iaiotasuna azaldu du bere ontzikideak olatuen gainean dantzan jartzen. Bizkaiko eta Euskadiko txapelketak eskuratu ditu dagoeneko Bermeok. Euskadikoa bosgarren aldiz 2007tik, bizkaitarren erregetza hasi zenetik. Txapelketei dagokionez, hortaz, berdeen aurretik daude urdinak, eta itsasoa zakartzen denean abilezia erakutsi dute. Espainiako Txapelketa eta Zarauzko Estropadak irabazten saiatuko dira, gero Hondarribira moralez gainezka etortzeko.Orio ez dabil urruti
Oriok bandera bakarra lortu du ligan, eta bigarren izan da Gipuzkoako Txapelketan eta hirugarren Euskadikoan. Ligan, sekulako iraultza eman ezean, ematen du bigarren postua dela lor dezakeen sari handiena, eta horretarako Urdaibairi hamabi puntu jan beharko lizkioke. Aurretik bezain urruti dituzte atzetik San Juan eta Kaiku. Ondo dabiltza oriotarrak, baina hiru hutsegite handi izan dituzte —seigarren Malagan, bederatzigarren Moañan eta zortzigarren Portugaleten—, gehiegi denagatik borrokatzea helburu zuen taldearentzat. Nolanahi ere, horiek izan dituzte ere une politak, arraunean badakitela erakutsi dute, eta kontuz, beraiek irabazi baitzuten Kontxako eremuan Koxtapek antolatutako IV. Eusko Label Bandera.
