Carlos Malles: "10. edizio hau egiazki berezia izan da"

Hondarribiko Blues Jaialdiko zuzendariak iazko jende kopurua gainditu dela jakinarazi du

Bidasoko Hitza

2015/07/13

Bob Stroger baxu jotzaileak jaso du 10. ekitaldiko Hondarribia Blues saria

Hondarribiko Blues Jaialdiko antolatzaileek oso balorazio positiboa egin dute bukatu berri den X. ekitaldiaz. Carlos Malles zuzendariak onartu duenez, iazko entzule kopurua gainditu dute, oso maila altuko kontzertuak ikusteko aukera izan da eta berrikuntzek ondo funtzionatu dute. Datu zehatzik eman gabe —udalak hori hurrengo egunetan egingo du—, Txomin Sagarzazu alkatea pozik azaldu da jaialdiaren balantzea egiterakoan: “Berriro ere musikaren erreferentea izan gara Euskadin eta Estatu osoan, eta oihartzuna izan du baita nazioarteko esparruan ere. Guretzat oso garrantzitsua da hori horrela izatea, turismoa sustatzen delako eta geure hiria kalitate handiko kultur proposamen batekin lotzen duelako”.

Shakura S’Aida, ostegunean

Oraindik egiteko lan asko duen arren, gustura deskantsatuko du jaialdiko zuzendariak, X. Blues Jaialdia nola joan den aztertu eta gero. “Espero baino ikus-entzule gehiago bertaratu da eta harrera ezin hobea izan dute edizio honetako proposamen berriek”. Hala, kontzertu pedagogikoa lehen aldiz Itsas Etxean egin da eta auditorioko 400 aulkiak bete egin ziren. “Kirol kaiko agertoki berriak ere jende andana jaso zuen”, erantsi du Mallesek. Aurtengo beste berrikuntzetako bat gazte musikarien lehiaketa izan da, Kutxa Fundazioaren eskutik larunbat goizean San Pedro kaleko eszenatokian egin zena. “Oso harrera ona izan du ekimenak, eta ikusiko dugu halako jarraipena eman dakiokeen”, gaineratu du Mallesek. Gitarra mintegia ere arrakastatsua izan zen, eskainitako 15 lekuak bete baitziren. Etorkizunera begira musika tresna gehiagora zabaltzea aztertuko dute. Jaialdiko zuzendariarentzat, ekitaldi berezia izan da urteurrenekoa: “10. edizio hau egiazki izan da berezia, eta hori hemendik igaro diren artista handiei eta bertaratutako ikus-entzule guztiei eskertu behar diegu. Artistek beti esaten digute Hondarribiko ikus-entzuleen beroa sentitzen dutela, hemen oso gustura daudela”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.