Goikoetxea-Erkiagak irabazi dute Hondarribiko Master Series-a

Finalean Olha-Israel gainditu dituzte bi setetan. Hondarribiko Master Series txapelketa irabazita, Jai Alai World Tourreko lidergoan jarri dira Goikoetxea eta Ibai Erkiaga. Gaur Gernikako finala jokatuko da.

Asier Perez-Karkamo

Hondarribia

2015/07/11

Lehen aldiz ari da Goikoetxea Jai Alai World Tourrean

Zesta puntako Hondarribiko Master Series txapelketako finala irabazi zuten atzo Goikoetxeak eta Ibai Erkiagak, Olha-Israel bi setetan gaindituz (8-15 eta 7-15). Markagailuak kontrakoa ulertarazi dezakeen arren, galtzaileek partida ona egin zuten, baina Goikoetxeak erakustaldia eman zuen eta Erkiaga oso sendo ibili zen atzekokoadroetan. Eta horren aurrean Olhak eta Israelek ezin izan zuten ezer gehiago egin. 300 pertsona inguru hurbildu ziren Jostaldira, dezente kontuan izanik blues jaialdia ere bazela herrian.

Irabazleak, Kalixa Silanes Kirol zinegotziarekin

Jaialdiko lehen partidan 3. eta 4. postuak egon ziren jokoan. Egiguren-Inza (Enbilen ordez) bikotearentzat izan zen Hondarribiko Master Series txapelketako hirugarren postua, baina kostata. Lehen seta erraz irabazi zuten, baina bigarrenean Zulaika-Urtasunek hortzak estutu eta berdintzea lortu zuten. Berdinketa hausteko setean Zulaika-Urtasun aurreratu ziren baina urdinek markagailua irauli eta Egigurenen bi paretarekin lortu zuten partida aurrera ateratzea. Jai Alai World Tour-reko sasoiko lehen txapeleta izan da Hondarribikoa, eta hortaz, sailkapen nagusiko lidergoan jarri dira Goikoetxea eta Erkiaga. Gaur, Gernikako Master Seriesaren finala jokatuko dute Beaskoetxea-Aldazabal eta Erik-Amigorena bikoteek, Txino Bengoa omentzeko balioko duen jaialdian.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.